左丁山寫泰國學生示威，一位藍藍地嘅老友就傳一段英文虎報嘅專欄文字到社交群組，一睇之下，原來作者就係嗰位斯里蘭卡人。N年前（起碼三十幾年）在南華早報寫Lai See嗰位，當年Lai See文筆潑辣，夠諷刺性，畀佢寫過嘅大公司、大銀行中人，往往畀佢激親，但又無可奈何，Lai See曾紅極一時，中環人無不日日閱讀。不知何故，斯里蘭卡人離開南早，Lai See雖然繼續日日有，但後來作者寫得冇咁刺激搞笑呢。
估唔到斯里蘭卡人還在，但近年寫稿已無人注意，料不到佢竟然會寫到泰國學生示威，沿用藍絲一套陰謀論，泰國學生背後有NED，即係美國CIA間接支持，手法雷同煽動香港學生在2019年搞運動。呢位先生，依家應該起碼七十歲啦，想不到思想咁簡單，噏得出就噏。泰國學生示威有長久歷史，駛乜外國勢力煽動及CIA策劃啫，思想閉塞之藍絲一類，永遠唔肯承認「物必先腐而後蟲生」呢句說話，必係認為「物不腐，CIA放蟲」；泰國軍人搞政變數年一次，貪污遍地皆是，泰國道德之神蒲眉蓬先皇仙遊，繼承人民望無法相比，在此環境下，學生示威容乜易，駛乜外國勢力策動？白俄羅斯、黎巴嫩人民示威反政府，又係美國在後面指揮？你估特朗普依家好得閒咩。
總之人一藍，腦就殘，無論昔日如何醒目，今日為了某些原因變藍，就連記憶力都退化，例如王亭之話1993年五十萬元可以買一個豪宅，又如作家數臭黎智英，斷估第一個太太係菲律賓空姐，及施潘氏寫文用咗施先生多年同事嘅姓名做筆名，製造誤會。
泰國大學生中學生今次示威，膽敢涉及皇室，係前所未有嘅事，需要極大勇氣，左丁山在泰國讀書時（1972-1974）曾在學校近距離見到泰皇蒲眉蓬行過，並無保鑣、警衛將左丁山及其他學生趕到二三十呎之外，泰皇備受尊崇，視民如子，民眾視之如神，不講他半句，發自真心，何解皇儲繼位之後，泰國竟有人不怕Lese majeste（冒犯君主罪），言多諷刺？這是區區NED/CIA幾十萬美元可以推動泰國學生上街的嗎？泰國軍人政府與中國關係良好，中國要打通雲南通往新加坡的鐵路，進展不如理想，加大力量支持泰國現政府是中國國策，明乎此，香港藍絲詆毀泰國學生，便不是那麼奇怪了。