香港警察將7.21恐襲用「指鹿為馬」教科書式演繹，市民因為警謊嬲到爆，網上即刻瘋傳好多同「指鹿為馬」有關嘅作品，包括《成語動畫廊》同《九品芝麻官》，對照今日香港真係深有共鳴。
噚日好多市民都氣憤難平，即刻搵返「指鹿為馬」嘅代表作，例如TVB多年前製作嘅《成語動畫廊－－指鹿為馬》，講到呢個成語嘅出處，正正係出自秦朝嘅趙高，要群臣齊齊顛倒是非去表忠，邊個夠膽講真話就殺；仲有人拎返當年ICAC個「指鹿為馬」反貪宣傳片出嚟，懷念港英年代執法者仲有黑白觀念之分；又有網民重溫星爺嘅《九品芝麻官》：「大人，點可以原告變被告呢？」、「將白改成黑」、「一定係啲刁民蓄意誣告！」真係句句應景。
除咗玩片，仲有玩改圖，網民將香港好多涉「馬」嘅嘢改成「鹿」，好似馬鞍山變「鹿鞍山」、賽馬會嘅標誌變成一隻鹿，暗寸香港荒謬處處。
不過，香港有人要力阻網民惡搞，TVB就去咗YouTube申請《成語動畫廊－－指鹿為馬》侵權下架。咦，咁點解其他集數「螳螂捕蟬」、「呆若木雞」等等仲未下架，又唔話佢哋侵權呢？不過網民堅持「刪一貼百」精神，繼續上載「指鹿為馬」集數，八方覺得，即使大台繼續刪，網民都會繼續上載，令大家唔會忘記「指鹿為馬」呢個成語呢。
李八方