縱容半歲姨甥踢肚掹尾當凳坐 黃心美唔教B反罵狗犯賤遭圍插

縱容半歲姨甥踢肚掹尾當凳坐 
黃心美唔教B反罵狗犯賤遭圍插

飼養4隻摩天使的黃心美,一向表現得愛狗如命,但前晚她在Ig限時動態公開短片,見她任由半歲的姨甥女豆豆向其中一隻愛犬Muffin掹尾、扯毛及腳踢,黃心美不但沒有阻止及教導豆豆,更形容寵物犬是「超犯賤」。其實她早前已試過縱容豆豆將狗狗當凳坐,連番不懂教B愛護動物的態度與行為,惹來網民狂轟「冇家教」。

■黃心美上周曾貼相指被半歲大的姨甥女豆豆踢一腳,「血都吐幾両」,現在卻縱容豆豆踢狗狗Muffin。

黃心穎和胞姊黃心美除了痛錫約半歲的姨甥女「豆豆」外,兩人亦是養狗之人,黃心穎早前領養了一隻唐狗,而黃心美則飼養了4隻摩天使,她不時在社交網貼出跟狗狗的生活日常片段。不過前晚黃心美在Ig限時動態上載幾條短片,令不少愛犬人士睇到火滾,皆因她任由豆豆向其中一隻狗狗Muffin踢肚、扯毛及掹尾,但黃心美卻只顧拍片,完全沒有阻止豆豆或保護狗狗。

其實早前黃心美已讓豆豆將其中一隻狗狗當凳坐,前晚3條短片則先是豆豆坐在梳化上,不停用雙腳狂踢Muffin肚仔,踢了幾下後,牠頂不住起身走去另一邊。至於另外兩條片,豆豆和Muffin似坐在地墊上,豆豆則不停扯牠的毛及掹尾,拍片的黃心美不但沒有阻止姨甥女,竟然還留言:「Muffin係超犯賤㗎!」、「Muffin犯賤嘅底可以話係根深柢固!」估計黃心美所指是即使被豆豆又扯毛又掹尾,Muffin皆沒有反抗,因此形容牠是「犯賤」,但見Muffin當時默默忍受小主人糟質的委屈表情,網民們都表示我見猶憐。

不少網民還留言怒斥黃心美:「小朋友可能唔識,但唔代表大人可以任由佢咁做又唔教佢。」又有網民指:「愛護動物係從小教起㗎,隻狗個世界得你,你唔保護佢就冇人保護佢!你自己犯賤並唔係隻狗,OK?」早前黃心美也曾貼出拿着零食餵狗的相片,卻留言:「有嘢食便是娘。」也被網民指摘她賤視狗狗,《蘋果》昨日聯絡黃心美,她透過經理人表示不回應。

■黃心美任由豆豆對Muffin踢肚、掹尾、扯毛,更指表情委屈的狗狗「犯賤」,遭網民怒轟「冇家教」,愛協也指成人要引導小孩要善待動物。互聯網圖片

■黃心美兩周前也貼過豆豆坐在她其中一隻愛犬上的照片。互聯網圖片

■有4隻摩天使的黃心美曾在Ig貼餵狗相,卻嘲笑稱:「有嘢食便是娘。」

獸醫指應抱開小孩

愛護動物協會昨對此表示,當小朋友與寵物互動時,家長或大人必須從旁指導,引導他們善待及不要過份騷擾動物。獸醫陳綽姿有一對孖仔及貓狗,她贊成小朋友跟寵物相處:「但要點到即止,狗係冇可能犯賤,只有愛嘅concept,佢愛主人同佢嘅家庭,所以先容忍。」她指出大人應教育小朋友:「當佢掹毛掹尾就要教佢唔可以,同埋可以抱開佢 ,只要重複咁做小朋友係明白,但𠵱家見情況係小朋友大晒。」陳醫生指黃心美此舉未有構成虐待,只是未有好好保護寵物,長此下去更會影響狗仔對主人的信任。

張美妮以圍欄分隔

家中養了一隻白威及一隻貴婦的利嘉兒,昨回覆《蘋果》表示作為大人兩邊都要教導:「我大肚時已教狗仔要錫BB,囡囡出世就同佢講,狗狗係佢嘅哥哥要錫。囡囡𠵱家有時唔識,會大力掹毛掹尾,我就阻止同埋教導。」她坦言狗仔始終是動物,若不教導可能會反擊傷及小朋友。至於有貴婦犬的張美妮表示,懷孕時已教育愛犬:「話畀狗仔聽即使BB出世,我對佢嘅愛唔會改變,之後我仲抱BB去狗仔身邊,狗仔真係會明白。」張美妮指為安全會用圍欄分隔囡囡及愛犬,但亦會讓他們交流接觸,因此感情要好。

■黃心美與黃心穎共四姊妹,今次事件主角豆豆,是三家姐黃心慧的女兒。互聯網圖片

■張美妮去年誕下囡囡「笑咪咪」,現在1歲多的囡囡與兩隻貴婦犬相處融洽。互聯網圖片

■育有一女的利嘉兒認為作為大人,不論BB或狗狗,兩邊也要教導。互聯網圖片