警方噚日企圖改寫7.21歷史，將原本白衫人「無差別襲擊」市民，講成雙方「勢均力敵，旗鼓相當」，仲拉咗林卓廷同許智峯，將原告變被告，呢招喺今日互聯網通行全世界、大量7.21直播片喺網上隨時睇到嘅時代，有幾多市民、甚至國際社會會信popo版本？恐怕唔使多講，而有網民為咗令7.21真相可以更廣傳，仲以7.21做背景整咗個電腦遊戲，仲有外國YouTuber介紹㖭！
早排有網民係reddit發帖，題目叫「Made a game that is referenced to the 721 attack in Hong Kong」，介紹一隻佢自己以7.21做背景整嘅電腦遊戲，暫時只係有Demo，佢之後再喺連登發帖，話呢個係一隻2D風格RPG 遊戲，而個Demo嘅任務係主線任務之一，主要參考7.21無差別襲擊事件，當然細節有修改以符合遊戲世界，所以故事內容同角色都係純屬虛構，仲戴晒頭盔話「如有雷同，實屬巧合」！
由於網民話佢仲讀緊書，空閒時間先可以寫game，而隻game嘅圖畫同音樂都係佢自己一手包辦，仲叫人如果想隻game可以畀更多人見到，可以下載試玩同畀好評，有外國YouTuber亦有介紹隻game。popo想改寫歷史，但時代唔同，唔再係你講乜都有信人，亦有人用不同方法，將7.21真相廣傳同保存，好似今次網民用game去記錄即為一例，有興趣可以去個game 嘅網址：https://mighcty.itch.io/legacy-of-datura 睇吓同下載試玩版。
李八方