回佣，係經紀聽到都嬲，包括我。我曾經被一個客要求回佣9成，講緊單刁1.4億元，業主單邊佣金2.5%，即350萬元，僅取1成佣金是35萬元。有無向現實低頭？唔講住。
開頭這位客人無講回佣，客人總是「嚇」，說甚麼「同區咁多盤使乜揀呢個」「經紀唔止你一個」。我攤開整區發展圖，跟客說：「附近有呢幾個盤推，𠵱家多人搶，買樓第一梗係買位置，今日買就貼住港鐵站，下一個盤就喺另一條街，港鐵站又喺另一條街……每個物業海景單位都有限，今日買就全海，遲啲買就係側海，再之後就係邊皮海……」
客人答：「好合理！」還約我兩日後到他辦公室收票，說一口氣買5個單位。兩日未到，他和他兒子走到我公司吹水又話「有買貴無買錯」，竟然要買多3個單位，成交價合共1.4億元。和味囉！但世事哪有完美，他就在臨簽約一刻，要求回佣9成。我無即場低頭，而說要跟管理層滙報，查實之後我就搵賣方大業主呻：「老闆，呢單刁個客要我哋回佣九成，唉……」這位大業主，真是抵佢發，他最終在這單交易提供額外70萬元的獎金，如果回9成佣金，仍可取105萬元，變相回佣7成，最後跟公司拆賬，我個人淨袋31.5萬元。係，我認衰，我認我回佣搶客，但跟很多經紀一樣，錯不在我，錯在市場。
小師兄