近日，我求大俠收到好多讀者投訴，話《蘋果波經》成日都落唔齊賠率，仲話成日因為咁，搞到以為冇波賭㖭。我真係要講聲冤枉呀！唔係唔想登賠率，係因為冇賠率畀我登咋！
喺呢個社會風雨飄搖同疫情夾擊下，就算經歷過報館被踩場，《蘋果波經》一眾手足依然繼續緊守崗位，提供足智彩資訊畀大家。歐聯完咗冇耐，各地聯賽又準備、甚至已經開番「咧」，球迷就繼續有得玩吓波，點知最近我哋收到好多讀者投訴，話我哋賠率表唔齊，令到可以參考嘅資訊少咗之餘，仲有讀者見到冇賠率表，差啲以為馬會冇開盤，少咗幾場波玩，點知一開馬會網頁，又有波賭喎，係咪《蘋果波經》揸流攤先？
我求大俠首先多謝繼續買報紙支持我哋嘅讀者先，不過想講番，我哋班手足真係冇偷懶。實情件事就係咁嘅，疫情下馬會好多時都係即日先決定開盤，既然係比賽當日先開盤，咁自然就冇隔夜賠率啦，所以早一晚就印好嘅報紙，都冇可能出現相關比賽嘅賠率。明白到少咗啲資料參考，當然會影響到大家贏錢啦，就連5大聯賽中嘅20/21法甲聯賽喺上周末展開，馬會都選擇當日先開盤。之不過疫情下好多服務都受到影響，好似巴黎聖日耳門因為要出戰延遲舉行嘅歐聯決賽，搞到原本已延至周六作客對朗斯嘅法甲揭幕戰，再押後至9月10日先開波。
我求大俠就問過馬會，有冇得可以早番啲開盤，等大家都玩得高興啲呢？佢哋就話：「因應疫情發展，足智彩一直密切監察世界各地足球賽事及球會最新情況，由於世界各地聯賽賽事對處理疫情安排並不一致，例如球員檢疫、隔離政策同取消賽事安排等。為確保資訊準確性以保障顧客利益，減少球賽喺開售後取消等情況，因此足智彩安排個別球賽只喺賽事當日開售。足智彩一直有為建立穩定及可靠處理疫情機制嘅聯賽及賽事如常受注。」佢哋補充將繼續監察有關情況，等其他相關聯賽建立穩定同可靠嘅處理疫情機制後，喺條件許可時陸續恢復如常受注安排。
最近呢個社會真係好多變數，個變化大到明明係隻鹿，都夾硬要話係隻馬。所以開盤定唔開盤，各位球迷除咗睇我哋《蘋果波經》，都可以睇埋我哋《蘋果》即時新聞，同密切留意足智彩網頁，跟番貼個社會節奏，咁贏錢就更有把握喇！