藥明生物（2269）三年前以20.60元招股上市，當時市場對生物醫藥股並不是太熱衷，同現在比係天淵之別，但無阻佢成為低調股王，半年升1倍，一年漲3.8倍，截至昨天，三年累升8.1倍，下星期五收市後更正式染藍，成為醫藥板塊的第三隻成份股。
作為散戶，問佢是甚麼業務，未必答得出，但藥明生物經常配股，卻一定知道。翻查記錄，由2017年6月上市日起，配股10次，當中有九次都係大配東減持套現，最近6月那次就係發新股集資，上市三年批股十次，即係平均約三個月就一劑，但每次都係越批越高，即使短暫跌穿配股價，最後都會上返，so far接貨者每次都係賺錢的。
藥明生物深受市場追捧，大股東屢次減持，仍無礙享有咁高估值，多次減持現時仲有另一個好處，就是獲納入恒指後，享有高流通系數，達75%。須知道恒指成份股計比重，係按流通市值計算，中移動（941）雖有萬億市值，但流通系數只有30%，在恒指佔比是4.2%；港交所（388）市值4,000億，但流通系數高達95%，比重卻有5.3%。根據恒指公司早兩星期的公告，新納入的3間公司，阿里巴巴（9988）受W股比重限制，只佔恒指5%；而小米（1810）有2.59%；藥明生物就勁喇，有1.75%，青冰之所以話佢勁，因為在成份股內，佢比任何一隻地產股及公用股的比重還要高，總排名約在第12位，相信日後要舞高弄低個指數，會好幫到手。
高盛早前有報告指出，阿里巴巴、小米及藥明生物，將會吸引到9.5億、3.6億及3.3億美元的指數基金買盤，前兩者買貨可能要分4日，而藥明生物就要9天。現時藥明生物一手都要9萬幾，散戶未必會吼，係正宗的基金股，咁未來7日指數基金要買齊貨，睇怕都要有唔錯的升幅，才可打動基金割愛了。
青冰