曾經係民主黨創黨成員，之後轉投林鄭月娥懷抱嘅勞工及福利局局長羅致光日前突然食咗誠實豆沙包，喺港台節目話同林鄭認識多年，見到佢由社署署長做到特首，「權力對我哋個負面影響係好大」，當權力越大，有時會忽略一些事情，「包括自己嗰種感覺，特別係良好感覺，好多時真係因為你喺某一個位先有」，又話當啲人開始唔同你拗嘢，咁你就反而應該驚喇，咁講明顯暗寸777自大！
雖然有神童之稱嘅羅致光同777由大學開始已好傾得埋，女人好小器㗎，777噚日就黑晒面回應，仲單打羅致光話以為講緊羅自己，暗寸羅由一個政客加入做一個官員，可能佢自己有啲感受，777又指自己「40 年如一日」。睇嚟林鄭真係如羅致光講，「有時會忽略自我良好嘅感覺」喎！公民黨楊岳橋聽完777回應，話唔知佢係咪受權力影響而自我感覺良好啦，定係無論777有冇權，都係咁傲慢呢？AY又舉過去一年林鄭嘅態度，由逃犯條例一出大家用各種方法勸阻佢，到之後不情不願暫緩，一直以嚟都係唔聽人意見，睇嚟林鄭話自己「40 年如一日」就無講大話嘞。
可惜呢啲說話就唔適合由羅致光局長講出嚟啦，話說前排政府高官大地震，前公務員事務局局長羅智光同林鄭拗完派唔派口罩俾公務員後，就被震走咗，有網民就話，睇嚟繼阿智之後，阿致都要被寫入「777小器簿」啦！事已至此，八方只能奉勸局長一句「睇路呀」！
李八方