早排有新聞報道，話G2000被商場封舖。縱橫江湖多年嘅田二少，自動地減租一半，可惜最後俾人當儍仔貼咗道符喺門口，變咗殭屍企喺度。炒開餸嘅龍皇酒樓，商場見佢無啖好食，就好心煮咗碟無情雞畀佢，幫佢斷水斷電。無情雞切得比較衰，大大嚿，俾人塞落口，聲都冇得出。
商業世界就係咁現實，大家都係利益行先。商場都要交數，還錢畀銀行，上市公司更要向股東交代。家陣商場追數，可能仲惡過黑社會。政府早前呼籲業主幫手減租，家吓商場就同租戶拔喉，送你一程。
講真好多業主根本唔想減租，除咗係合約精神外，更加係同經營風險有關。發展商係負責起樓嘅，玩法係問銀行借錢，再用租金回報來賺取息差。營運風險一向都唔關我事，最多有時貪玩食吓Turnover Rent。
有報章比較咗唔同商場嘅出租表現，海港城係大型商場中可以話係最差，基本上已經跌到90%，即係十室九空。同樣都係經營甲級商場嘅太古地產（1972），出租率就依然企喺100%。有人話從出租率，就睇到邊個係租戶嘅「白名單」。
太古嘅商場比較貼近民生，租戶大多服務附近居民，減租係戰略取捨。但對海港城呢類食開自由行條水嘅，好多嘅店舖基本上處於「用手打枱波」嘅狀態。簡單講，呢班租戶喺商場心目中已再無利用價值。既然你都無利用價值，做咩要減租畀你。
政府叫商場減租？其實唔多現實，因為好多商場家陣都知形勢唔對路。手中好多租戶，其實短期內都難以翻身。留你喺商場，其實都意義唔大。做生意嘅，租金可以有拖無欠，但如果商場覺得你係冇得救嘅癌症病人，倒不如同你講聲Sayonara。
清空咗啲冇咩希望嘅租戶，順勢利用呢個時間做吓裝修，之後引入返啲比較硬淨嘅租戶，將來又可以加租。近期有個日本大客叫驚安之殿堂，喺疫市中擴張。呢啲租戶家陣就最受商場歡迎，除咗交到租，最緊要大食，一嘢就食你成萬呎。
管理層唔介意被租戶列入「黑名單」，最緊要係入到董事局心中嘅「白名單」。呢啲就叫：業主現形，送你一程。
藍友斑