【姐匙Talk】鵰嫂暗打毒針防女埋鵰哥身

鵰哥、鵰嫂係圈中嘅模範夫妻，不過男人好多時都襟老過女人，尤其鵰哥生得高大威猛，年紀越大仲越有男人味；相反鵰嫂退隱江湖之後，身形就開始發福走樣，見到老公身邊咁多小花團團轉都咪話唔驚。多年前，Jessie已經聽過鵰哥因為同「火辣姐」疑似出軌，搞到鵰嫂嗌晒離婚，好彩多得一班老友幫口擺平，最後先可以維持呢段婚姻關係。

新丁小妹好傾惹禍

其實鵰嫂唔係表面上咁溫馴，為免俾人有機可乘，鵰嫂平時都mark得老公好實，一得閒就以探班為由，𥄫住老公為實。早前鵰哥拍攝新劇，Jessie聽劇組人員講，現場有位「新丁小妹」就係衰黐得太埋，最後連戲份都冇埋。年齡上，新丁小妹絕對可以做得鵰哥個女，不過佢哋就好傾得埋，唔使埋位時兩個人都有講有笑。新丁小妹屬爽朗型，唔係刻意姣男人嗰種，喺其他人眼裏，鵰哥同新丁小妹都只係傾得埋嘅朋友，絕對冇任何親暱舉動。不過，鵰嫂似乎聞到味，覺得新丁小妹意圖不軌，所以就去高層面前打毒針，要求狂減新丁小妹戲份，等佢唔使再喺片場眼冤。

大家覺得新丁小妹原本可以憑嗰部劇上位，而佢自己知道被狂減戲份後，即喊晒口求情，但監製都唔係最高決策人，亦愛莫能助。

撰文：Jessie

本欄逢周三刊出

姐匙Talk

我姐匙縱橫歌影視幕後，多年冷眼旁觀，娛樂圈大小事都走唔過我雙眼，歡迎大家剝花生。