好多外國人真係好有「吉士」，就算武漢肺炎疫情未受控，又有唔少聚眾後爆發大型感染嘅例子，但佢哋總係重複犯錯。好似已經退役嘅奧運八金飛人保特，上周搞完34歲生日party，唔戴口罩係咁滿場飛，仲要貼晒身咁勁歌熱舞，結果周一就宣佈佢確診武肺，而且曼城翼鋒史達寧都有份參加今次party，好彩之後佢去做檢測證實係陰性，亦順利喺周二入選英格蘭領隊修夫基徵召嘅九月歐國聯大軍名單。
上周五係保特34歲生日，牙買加傳媒報道話有朋友幫佢搞咗個大型party，仲請到唔少體壇名人出席，足球界就有本身都係牙買加裔嘅史達寧，同埋利華古遜小將里安拜尼。由網上發佈嘅片段見到，保特同一班賓客都冇保持社交距離，而且既然搞得party，正路梗係唔會戴罩，加上不斷狂歡熱舞，自然傳染得好快。至於亦有相見到史達寧俾位着住藍衫嘅男人攬住條頸，對方仲作狀好似想錫佢咁，睇嚟喺酒精推動下，大家都玩得非常放！
不過，唔知係咪狂歡完一晚後，保特可能先醒覺咁樣好似有啲唔對路，第二日就去做病毒檢測，禮拜一已經知道結果，證實對武肺病毒真係呈陽性反應。佢亦立即喺社交網絡同大家公佈呢個消息，仲話自己會做個負責任嘅人，即日起開始自我隔離，但就話自己冇任何症狀，亦呼籲佢班朋友最好都隔離。
牙買加衞生部就話希望同保特有接觸過嘅人，都最好自我隔離，確保安全。史達寧就聽咗呼籲，知道老友中招後即刻去驗，而且結果已經出爐，證實係陰性，為以防萬一，佢嚟緊幾日都會繼續驗，但有消息人士向天空體育透露，佢家陣情況良好，冇任何病徵出現，暫時都可以放下心頭大石。
至於修夫基周二公佈事隔10個月以嚟最新一期國家隊大軍名單，除咗史達寧仍然獲徵召，之前喺希臘鬧事襲警嘅曼聯隊長哈利馬古尼都一樣有份。
修夫基喺記者會叫大家唔好擔心史達寧會帶病毒入營，話佢報到嗰陣會再做病毒檢測。另外，紅魔前鋒格連活特同曼城中場菲爾科頓就係第一次入選，而修咸頓射手丹尼艾格斯更加差唔多事隔五年，再次獲徵召加入英格蘭國家隊大軍。
