高官不斷硬銷全民檢測，陳局長鬧爆年輕人，扣年輕人播毒帽子。咁怨毒，難道口中那五百萬，催極都唔夠票？不，唔係票，係吊鐘邊緣打圈的分泌物。撩喉嚨示忠，五百萬+的咽拭子，由撐国安法大聯盟獨家包辦實夠數吧。排隊人龍中，不難見到王冬胜，名人效應掀動，藍絲聯署閒閒哋過三百萬，咽拭子由國家隊冠名兼贊助，宣傳力度勁七倍，冇五百萬嗎？批醫管局范主席個頭落來都冇人信！
高官落足嘴頭，不惜落埋降頭，民情卻冷淡，看來要令國家隊失威了。火眼實驗室拍烏蠅，健康碼嘟唔成。鄭市長篤數形容隱形傳播鏈中的千五個播毒者，無論如何要揪出。三萬警乃鄭市長的靠山，撩硬。其他紀律部隊有愛黨底氣，唔係底褲所以唔怕輸。公僕二十萬，計埋打算秋後算賬那批，不准閉嘴說不。擘大個口被撩是光榮使命，菠蘿工會難托手踭。賣成幅牆廣告撐候選人的乜乜社團，話唔定一開口就有167萬團友。再急召走私貴婦狗的大灣區狗主（54萬喎）回港做測試，信用系統有眉目了，以香港再出發之名，駱公公代表選管會鄭重頒佈，持健康信用碼者，方可投票。