【收市閒情】「殼王」拍檔破產了 - 千頌C

【收市閒情】「殼王」拍檔破產了 - 千頌C

正所謂沒有比較,就沒有傷害。TVB(511)股價早於上星期五,已被港視(1137)超越,就算噚日港視高位回吐,股價仍然高過大台,市值仍然一個double,達83億元。TVB嘅沒落,可以由「殼王」陳國強2015年正式「坐正」數起。入主前,即係2014年,全年收入近58億元,賺14億元;睇返2019年條數,全年蝕近3億。50年基業,只需要4年時間,就近乎毀於一旦,厲害程度,我會比喻為——僅次林鄭。

「殼王」退休,以往身邊紅人,似乎陸續運滯。繼劉高原6月被迫辭任南岸集團(577)主席後,噚日一份通告,令中環人又邊食花生邊八卦。

話說凱華集團(275)公佈,話葉家海因為喺8月3日被高院判破產,按公司章程必須離職,冇得做董事,簡單講,即係破產兼失業!葉家海呢個名,如果你Google佢,會見到「陳國強嘅親密戰友」、「陳國強拍檔」、「低調富豪」。佢以往嘅工作,就係同陳國強密密「合作」做刁,好似今次出通告嘅凱華,前身係錦興,隻殼亦係葉家海由陳國強手上買返嚟;佢哋仲friend到,曾幫陳國強做TVB替代董事。

喺金融界做大刁食大茶飯嘅人,你話佢生活過得好樸實,都好難令人信服。想當日,冼國林飛去濟州島出席金利豐(1031)朱太60大壽,之後染上惡菌要切除左眼,去程坐嗰架私人飛機,正正就係葉家海擁有。我曾經都同佢有過一面之緣,可以話係豪飲豪食嘅大豪客。

好啦,問題就喺度啦!一個做開刁億億聲嘅大莊家,呢類人一般對貧窮定義係點?有個曾經叱吒風雲嘅莊家,就同我朋友咁樣呻過:「唉…呢期好窮呀…得返幾千萬身家。」係好誇,但貧窮真會限制想像。

係嘅,葉家海上年已經財困,江湖傳聞佢五至六年前,發好多債券畀大陸人,等佢哋投資移民香港,到呢幾年債券開始到期但又冇錢還;上年年底,又俾華融資產(2799)入稟高院追數1億。金融圈關係千絲萬縷,一個出事,好多時表示,佢背後條產業鏈都出大事。今日表面爆嘅係葉家海,實際背後仲有幾多人爆煲?相信過多一排我哋就會知答案。

千頌C

fb.com/winbigwok