今年芳齡70歲姐姐葉劉淑儀，周一扮到成個迷人pink lady咁賀生日，仲喺fb同市民開心share。姐姐話，往年寶貝女兒Cynthia會幫佢大搞Party，仲叫埋新民黨一眾黨友開心聚下。不過，今年寶貝女喺海外，加埋限聚令，守法嘅姐姐就話唔大事慶祝。
雖然喺私人地方啫，但一眾新民黨黨友好似冇將二人限聚令放喺眼內，喺秘書處大搞Party，成20幾人喺秘書處狂歡，又朱古力又蛋糕，仲叫埋高級日式便當，睇到啲相都感受到佢哋有幾開心。雖然佢哋都有戴口罩，不過20幾人一齊除罩食嘢，始終都唔係幾好。佢哋肯定係覺得姐姐越老越强壯，壯到連武肺都要企埋一邊。
晚市禁堂食、姐姐夜晚就換上條little black dress，露出若有若冇嘅事業線，應邀去到蘭桂坊一間意大利餐廳打卡除罩食／影蛋糕。姐姐強調，佢係應呢間餐廳店主邀請，「獨自前往拍照留念，其間店主更送上迷你蛋糕，為我慶祝生辰」，即係話，姐姐係一個人去，冇違反限聚令；但禁堂食令呢？
姐姐話，生日願望係疫情早日遠去，大家身體健康。八方就喺度衷心祝福姐姐同一眾新民黨黨友百無禁忌，他日唔會成為姐姐大壽群組啦。
李八方