周日歐聯決賽拜仁慕尼黑憑京士利高文喺下半場一箭定江山，最後以1:0小勝巴黎聖日耳門（PSG）成為歐洲之王，19歲左閘艾方素戴維斯喺攻守都扮演咗重要角色。有趣嘅係，原來戴維斯女友祖迪蓮都係職業足球員，佢效力嘅球會咁啱係男友歐聯決賽對手PSG嘅女子隊，球隊亦都殺入女子歐聯四強，爭冠叫緊糊。唔知戴維斯可唔可以過啲運比女友，幫佢首度贏到女子歐聯冠軍，然後做球壇史上第一對同季贏到男、女子歐聯冠軍嘅神雕俠侶呢！
好多足球員都鍾意揀個樣靚身材正嘅模特兒嚟做女友，戴維斯就非常好彩，識到個同樣嚟自加拿大嘅女友之餘，祖迪蓮仲有天使面孔同魔鬼身材，兩人更志同道合，係職業球壇比較罕見嘅足球情侶！其實佢哋16歲已經拍拖，一齊咗第二年就齊齊贏得加拿大U17年度最佳球員獎，今年4月剛好係拍拖3周年紀念，兩小口好似「糖黏豆」咁度過咗球季停擺，然後返去各自效力嘅球隊衝刺。
戴維斯已經幫拜仁榮登三冠王，而司職前鋒嘅祖迪蓮亦幫PSG取得女子法甲亞軍，今個月仲有機會再嘗歐聯決賽滋味。佢效力嘅PSG女隊，啱啱喺上周六歐聯8強以2:1淘汰阿仙奴殺入4強，對手本來有機會係拜仁女隊，上演一場翻版男子歐聯決賽，但後者以1:2輸畀里昂。祖迪蓮嘅PSG會喺30號於西班牙上演嘅歐聯4強鬥里昂。祖迪蓮喺上周六場四強並冇上陣，但喺今屆歐聯為PSG踢過4場比賽入咗4球，數據相當唔錯。
PSG女隊曾經喺2015年同17年入過決賽，但都無緣冠軍，希望祖迪蓮可以沾到男友戴維斯嘅冠軍運氣，幫球隊贏波啦。唔少球迷都喺網上留言講笑，話若果戴維斯同祖迪蓮真係歷史性一齊贏到男女子歐聯，真係要好好慶祝同紀錄一下，仲話要搵Netflix拍紀錄片㖭！
由難民營走到歐洲足球嘅最高殿堂，艾方素戴維斯嘅一切都得來不易。佢雙親係利比里亞人，該國亦係世界最貧窮嘅國家之一，更曾因爆發內戰搞到屍橫遍野，雙親逃亡去另一非洲國家加納後，就喺首都阿克拉Buduburam難民營定居，佢哋亦喺嗰道生咗戴維斯。戴維斯喺營內生活到五歲，期間同難民營嘅小夥伴喺泥地球場上踢波，被高度讚賞速度極快係入球機器。直到加拿大政府推出難民接收計劃，佢哋一家人就移居去艾伯塔省埃德蒙頓，佢邊返學邊照顧細佬妹，亦喺免費足球培訓計劃下接受正規訓練。