長期俾來歷不明人士貼身跟蹤嘅黃之鋒，星期日同朋友本來想去山頂放狗，點知都俾一班藍絲滋擾，由於佢哋人數多過三個人，除咗公然違反限聚令，喺公眾地方破壞社會安寧，更加如同非法集結，之鋒即刻做咗簡單調查，搵到涉事藍絲嘅座駕，發現車主同一個在職警長同名同姓，車輛登記地址亦喺紀律部隊宿舍。班藍絲連點解佢哋用PoPo架車搞之鋒仲未解答到，竟然惡人先告狀，質疑點解之鋒星期日可以check到車牌資料，仲想追究運輸署入面有「漢奸」，結果又畀網民恥笑，原來藍絲無知同社會脫節唔係扮、係真㗎！
話說當之鋒公開參與滋擾行動嘅涉事車輛登記後，藍絲群組如獲至寶有驚世大發現，提出事發當天係星期日運輸署休息，而呢期因為疫情職員多數WFH，質疑之鋒點拎到啲資料，仲懷疑運輸署有「漢奸」，有人又話黃絲滲透入晒政府，一定要「鏟除」內奸！
之鋒唔知係咪唔忍心班藍絲「人一藍，腦就殘」，噚日將謎底揭開，教班藍絲香港政府有個一站通網站，只要畀45蚊就查到有關資料，「不論星期一至星期日，無論晴天陰天雨天還是打風行雷閃電，也會照樣向公眾提供服務」，佢最後仲不忘寸多句班藍絲咁撐政府，「理應熟悉政府提供服務，知道了嗎？」網民就瘋狂恥笑，話藍絲淨係識收錢，畀錢嘅嘢識條鐵咩！又有人笑藍絲「佢哋應該仲停留喺返寫字樓，開文件大櫃，逐頁揭folder嘅年代。定係佢覺得係mission impossible 要冷氣槽吊落去偷資料？」
李八方