有朋友自加拿大回港，隔離14日後仲驚住連累朋友，索性閉關一個月先至通知左丁山：「返咗嚟嘞，你最近點呀？」左丁山答佢：「每日洩氣多一些。」加拿大朋友傳來南華早報8月19日報導，講歐盟駐港代表Carmen Cano De Lasala駐港四年後，即將離港，臨別前接受南早訪問，慨嘆今天香港情況與四年前不一樣；香港有咗國安法之後，佢發覺香港媒體、大學、學校都增加咗自我審查（Self-Censorship），國安法中之顛覆及勾結外國勢力條款，令人十分疑惑，恐懼情緒及不穩定性日漸增加，8月10日搜查報紙（按：即200警察大搜蘋果日報）一回事，傷害咗香港之國際形象。歐盟公司其實致力保持政治中立，但歐盟睇唔到國安法點樣會合乎基本法，歐盟公司被迫重新估計在香港經營之吸引力。
咪係囉，香港之國際性、吸引力、每天少一些，香港人士氣都每日洩一些啦。6月30日之後，一如所料，藉住國安法開始整肅教育界與傳媒界，8月10日之事，就係要大力發響第一槍，驚醒香港傳媒，以後要聽話，馴服一啲，大長藍絲威風，大減黃絲志氣。教育方面，先有考評局經理楊穎宇（曾被黨媒集中火力攻擊）辭職，繼有考評局秘書長蘇國生任滿不願再續任，只係做咗三年啫，同過往前任做足六年嘅情況唔同。現任考評局主席容永祺係全國政協、AIA人壽保險大猛人，由佢主持招聘秘書長，唔駛評馬人都知道有乜血統嘅馬兒會被揀中，容先生曾任博彩委員會主席，監察馬會之博彩政策，通常係採取從嚴態度嘅。大膽引伸，以後考評局嘅通識、歷史考題一定冇甚麼討論「利與弊」嘅題目。
之後又有教育局大力刪改通識教育課本，全刪涉及「三權分立」資料或段落，刪走「中國仍未算是法治社會」，人大代表「人民代表性低」等字眼，刪走「普通法極為重視個人的自由，權利與人權的保障」的段落……。左派人士經常話港英時代教育係奴化教育，現在由佢地話事，仲唔玩個夠本。問一位中學副校長Y：「你點睇？」佢答：「好彩我教alpha，beta數學科，完全唔駛講歷史政治，教多幾年，退休咯！老校長問我願唔願升做校長，我話唔好害我呀！」唉，怎麼不是每日洩氣多一些。