【本報訊】香港槍會1973年從葵涌搬至荃灣川龍現址，較郊野公園1979年成立早，獲政府根據《私人遊樂場地契約》以1,000元象徵式地價批出約6.49公頃土地。本土研究社翻查槍會地契發現，地契內早已列明要求槍會為其造成的污染及廢棄物自費處理，目前情況已違反地契，質疑地政總署多年未有執法行動。
本土研究社成員陳劍青指出，翻查地契內容，香港槍會疑違反了地契，「睇返地契，都幾多條文係為佢度身訂做，例如要佢睇返啲污染物同廢料，唔好影響到附近嘅集水區、政府相關物業，包括引水道」，認為若香港槍會沒有清理射擊垃圾或已違反地契，「所以𠵱家情況唔係冇條例去執法，而係執法部門有冇去行動。」
根據地契內容顯示，一旦槍會所屬地段對政府物業造成污染及破壞，租借土地一方需要自費移除廢物，以及彌補和賠償任何對政府物業造成的損害。陳劍青又指，若屢次違例，政府可動用最高懲罰級別，「就係收回土地。」
目前香港槍會的準會員入場費需要10萬元，終身會員更高達30萬元，陳劍青質疑槍會不會沒有財力處理射擊垃圾，「收咗咁多錢，點解冇用嚟保障返個環境，同埋本身《私人遊樂場地契約》已經特惠批地，呢個佢自己都講唔過去。」