新一季英超好快會喺9月12日開鑼，上季冠軍利物浦更會喺今個禮拜六踢社區盾，同英足盃盟主阿仙奴對壘。紅軍早前已由領隊高普拉隊去奧地利展開季前集訓，上周六首場熱身賽對德甲嘅史特加，最終靠羅拔圖法明奴、拿比基達同「世少金靴」利安比維斯達入波，以3:0大勝。啱啱加盟嘅希臘新兵左閘迪斯米卡斯亦喺下半場首次上陣，不過因為一次進攻冇傳波畀占士米拿，賽被後者爆粗「問候」。相信今場過後，呢位24歲新兵應體會到喺紅軍踢波係需要幾高要求喇。
呢場波高普排出嘅正選陣容相當完整，除咗「埃及文明」擔正外，連法賓奴泰華利斯、安德魯羅拔臣同華基爾雲迪積克都全數正選。雖然比賽喺雨中進行，不過就冇影響紅軍表現，上半場已有法明奴同基達建功，半場輕鬆領先2:0。下半場利物浦收起唔少主力，但照樣有小將利安比維斯達接應米拿右路橫傳勁射入網埋齋。
至於啱啱以1,175萬鎊由奧林比亞高斯加盟嘅新兵迪斯米卡斯，今場「地標」戰就有一次唔係太開心嘅經歷。迪斯米卡斯上陣僅七分鐘，紅軍隊長米拿就將個波傳畀佢，希望迪斯米卡斯同自己嚟一次撞牆，點知迪斯米卡斯可能首次登場太緊張，居然將個波回傳畀南野拓實。米拿對迪斯米卡斯太保守嘅踢法相當不滿，仲即刻擰轉頭爆粗鬧佢，不過迪斯米卡斯就冇將件事放喺心入面，賽後仲話自己首次為紅軍出戰好開心，希望繼續努力適應環境。老大哥米拿賽後亦喺社交網度回應，話咁都畀人捉到佢鬧新仔，不過求驗客相信佢都係比賽認真，旨在希望班新仔踢得醒神啲啫。
同日有份踢熱身賽嘅熱刺，喺缺少哈利卡尼下對英甲葉士域治，最終憑孫興民梅開二度，加上賴恩施斯隆嘅入波，同樣大勝3:0。新加盟嘅中場賀積查治同門將赫特都上演處子戰，前者正選上陣踢到下半場先被摩連奴換走；不過赫特下半場被換入之後，踢唔夠30分鐘又被換走，表現機會唔夠賀積查治多。