前香港眾志秘書長黃之鋒繼日前遭到疑似國安跟蹤後，噚日下午佢趁周日同朋友上山頂放狗期間，點知又遇到冇品藍絲大媽跟蹤兼滋擾。之鋒後來發現，呢個表面上係冇品藍絲大媽，其實可能係同警察有關。
話說之鋒，噚日同朋友去到山頂放狗時，突然遭到六名藍絲上前包圍指罵，其中一名藍絲大媽更全程粗口爛舌，一邊舉機、一邊辱罵之鋒同佢朋友，令到之鋒都忍唔住上前理論，力斥對方：「真係好冇品、好低質。」
之鋒喺fb直播片段話，呢班藍絲聲稱自己唔係記者，亦都唔係國安，但就唔知點解喺山頂全程跟蹤滋擾佢。據之鋒嘅片中所見，呢班冇品藍絲除咗有不堪入耳嘅粗口外，loop嚟loop去都係鬧人係「漢奸」、「賣國賊」、「搞亂香港」，又猛問之鋒「係咪中國人？」聲稱之鋒「唔代表佢哋」，之鋒就話，自己從來冇話要代表呢班低質藍絲。
呢班藍絲為乜會咁得閒搞之鋒大半日？之鋒之後查跟蹤佢架車嘅車輛登記地址，發現竟然係順利紀律部隊宿舍，登記車主姓名又同一名在職警長同名同姓，即係藍絲用警長登記車輛滋擾佢！至於冇品藍絲大媽係乜來歷、同PoPo有乜關係？呢個之鋒就唔知，但起碼證明原來警長係有協助烏合之眾滋擾民主派政治人物，呢件事亦令之鋒知道藍絲嘅行動，背後竟然有PoPo提供「一條龍服務」！
李八方