港台廣播處長梁家榮早前講明，下年8月任滿後唔會續約，港台連環畀商務及經濟發展局局長邱騰華同差人搞，到底「榮總」係心灰意冷唔做，定係引咎下台，八方無從得知喇。不過八方聽聞港台已開始物色接「榮總」個位，當中包括資深傳媒人馮強，據知唔少相同級數嘅人都收到相同查詢，但好多都耍手擰頭。
做過《南早》、《讀者文摘》管理層，又曾喺大專打滾多年，做過教師同公關嘅馮強，早排就喺facebook話，有獵頭公司打畀佢，問佢有無興趣申請廣播處長一職，佢當時就話要啲時間考慮吓。八方之後向馮強查詢，佢就話唔方便透露太多。
不過《蘋果日報》前老總鄭明仁就喺佢個Post度留言話︰「很多行家都收到同樣查詢，都拒絕了。」仁哥同八方講，聽聞行內做開廣播或者電視台嘅資深傳媒人，十居其九呢排都有獵頭公司接觸，獵頭公司所搵嘅名單同當年物色榮總嘅人選無大分別，所以邊個獲邀都心中有數。
仁哥又同八方講，呢個位又要搞掂下屬、又要應付政府同建制派壓力，加榮總「前車可鑑」，大部份人連參與遴選都未必肯制，佢識嘅老友都唔可能做到「百分百順從建制意見」，所以相信政府可以搵嘅人選其實得幾個，「爭在最後係邊個肯做」。
有同樣俾獵頭公司搵過但婉拒嘅資深傳媒人亦都同八方講，做得呢個「三煞位」，好大機會要獲西環首肯，佢仲畀咗幾個可能人選畀八方，當中有早排被「明升暗降」，由新聞部主管轉任顧問嘅馮德雄，但「大馮」喺當前政治局勢下，未必過到政治審查一關；另一個係掌管大台新聞部多年嘅袁志偉，不過「花蟹」雖然獲政府同西環信任，但佢會唔會入熱廚房就真係唔知喇！
李八方