上連登睇到，好多新手炒美股閒閒哋都贏三四成，搞到其他未贏到嘅連登用戶懷疑人生。最近呢幾個月，只要敢買美國科技股就有得贏，技術成份唔高。
過去一年，由香港一頂綠帽而產生嘅國際大事，相信令香港人對美國為首嘅西方世界人點思考，有多咗好多嘅體會。其中一個行為模式：為咗一個理念，唔介意損害自己利益去開始，換取將夢想實現嘅機會。
近幾個月不斷有新聞話外國放寬香港人簽證，於是坊間紛紛解讀，話香港人質素高、有錢，同西方思想接近。質素高同有錢，高明冇意見。但同西方思想接近，就未必，特別喺個錢字上面，香港人一般都係審慎理財，應用喺投資上，第一時間就問有冇息收、估值抵唔抵等等。
審慎理財到咗今日就係雙刃劍，香港累積全世界都謀住嘅財富就係靠曾蔭權嗰種謹小慎微香港仔心態。但同樣心態去買美股、去博，就永遠都買唔到𠵱家狂升嗰幾隻科技股。第一句：貴；第二句：冇息收。心態已經同呢類股票絕緣。如果以情緒計，美股大致有以下特質：
1. QE之後有好多錢
2. 唔介意一直追捧買未來，但一定要有最尖端科技
3. 如果只係業績好，但科技上唔係第一，只會當普通股票咁衡量。
有一個統計數字，翻查過去納指12次最長牛市紀錄，牛市一旦啟動，12個月後有91%是升，納指牛市冇咁易會完。
如果𠵱家仲懷疑緊人生，點解人哋賺自己冇份，可以用最簡單嘅「一股策略」：買一股先。美股可以一股股咁買，幾百蚊美金一股人人都負擔到，以一部iPhone價錢為上限，買一股，入場感受吓股價升跌，輸晒當跌咗部iPhone。炒股永遠謹記：冇份贏、慘過輸，除非你唔參加呢個遊戲。
證監持牌人，持有蘋果（AAPL）。
高明