美斯早前專登取消假期返巴塞隆拿，同新帥朗奴高文傾前途問題，點知轉頭就畀加泰傳媒踢爆佢想走多過留。事後有阿根廷傳媒就話，美斯對會面內容被公開感到好嬲，質疑有人特登向傳媒放料，試圖將佢塑造成一個喺巴塞陷入危機時急急跳船嘅魔鬼形象，矛頭直指係會長巴杜美係放料人。事實上，巴杜美之前為保權威同聲望，都請過網絡打手「唱衰」同佢意見不合嘅球星。