去年阿仙奴炒咗前領隊艾馬利後，由名宿龍格保出任暫代領隊，直至阿迪達上任後，龍格保就退居助教輔助阿迪達。而上禮拜六阿仙奴喺官網宣佈，龍格保會卸任助教一職。龍格保就話今次離開係希望可累積更多執教經驗：「為咗增加執教經驗，我決定離開我喺阿仙奴一隊嘅助教職位。我從1998年起就一直喺呢度，無論作為球員或教練，都好多謝阿仙奴俾我嘅機會。」