渣哥搞公投，定舖位，碰了一鼻子灰，龍門（瓏門）冰室老闆張俊傑不摻一腿，沒說半句。其實二人不是正邪對立，渣哥萬千寵愛在一身的時候，不代表張老闆是賣港黃奸，渣哥被罵人渣哥，也不等於張是人中俊傑。
也只有張老闆，一年之間由民族英雄變成過街老鼠，又仙又死，「偽黃」、「食人血饅頭」、「呃手足錢」，黃圈數得出的罪狀都算在他頭上，反而他沒說過其他黃店不是，這一年來他首次開腔絕地反擊：「龍門有冇出嚟講過一句？我從來唔插其他黃店，我唔指名道姓，我唔暗寸，呢個就係龍門底線，但我覺得佢哋過X晒底線！」
撰文：陳勝藍
攝影：許頌明
不少fb網頁、黃店將龍門當作小夫，話入就入，最近有fb帖子控訴張俊傑強姦別人女友，今次訪問不是為了渣哥失手，而是這條彌天大罪，究竟他有沒有強姦民女？「梗係冇啦，大佬，有冇做過自己知。」張老闆自辯。
強姦與否，我們不用充當判官，也當不來，香港法治固然走進深切治療部，但綜觀他在訪問中開口埋口「X」政府，而且國安法下別人不敢說的，他說得特別起勁，可以入罪的話律政司不會對這個人客氣，但張老闆恁地認真，一氣之下將資助手足的50萬元入數紙放上網，起碼駁斥呃手足錢的指控。
他訴苦：「黃圈變到同大家所講唔一樣，當初話香港人要罷紅店，罷藍店，支持黃店，希望由土生土長香港人開黃店，一路發揚光大，取代美心、富臨，但到我退出黃圈一刻，黃色經濟圈唔係黃色經濟圈，係黃色慈善圈，『我捐咗6萬！』『我捐咗10萬！』」
退出黃圈是6月底的事，批評聲音不絕，既然此圈不是正式，龍門從沒申請加入，又何來退出？他解釋自己不堪鬥黃，好些店子是2014還是19年抹上一片黃也要拼個你死我活，他拒絕再玩，「大家係咪要出示履歷？我遲過你但我做得多過你又唔得？係咪要咁樣比？十萬零一蚊大過十萬蚊，咁就好威？𠵱家唔係玩話事啤。」
張俊傑不擅辭令，但爆粗罵人口若懸河，下面「X」代表甚麼動詞抑或器官，靠大家想像，「到最後你覺得黃人想點？想我哋贏，光復香港，又唔見藍店互鬥，你有冇見過美心X富臨？點解黃店做到咁仆街？如果咁X樣我寧願話自己係藍，又或者你話你自己係藍啦好冇？我唔X想同你一齊。當時我退出黃圈就係覺得呢班人好X討厭，日日抽水，日日寸X人，咁X叻你唔寸藍嗰邊？X你老母，龍門有事你走去寸X佢，我個夥計俾人扑你走去寸X佢，黑警有事你唔X寸X佢，黐X線㗎！」
他越罵越火：「你話黃到咁X樣有咩用，你火唔火吖？畀你係黃人見到黃店咁X樣，咁X樣叫黃店，X你我覺得你衰過藍，藍從來唔X笑自己人。」再多的粗口我們也承受得起，然而「光復香港」成了明教布袋和尚「說不得」，記者只替他擔心，「你話我講啦，我唔驚，到呢一刻我都想光復香港，都想香港人贏，但你（別的黃店）唔係咁X樣嘛，你唔係想香港人贏，係想你間舖贏。」
話雖如此，他不會宣稱變藍，「我做唔出，我冇變過，我由頭到尾X政府。」黃藍本來難辨，曾幾何時龍門在觀塘開舖，月租14萬，未幾旁邊28萬貴舖租出，取名龍X冰室，老闆竟是舊夥計，對方直言獲大陸老細打本500萬元。張堅庭幫襯龍X後出帖，批評食物質素及只收支付寶，更要命的是張俊傑搜索地圖，發現該店是黃非藍，「嘩X你吖，明明大陸資金，你走嚟話自己黃店！」
今時今日《蘋果日報》多得有心人落廣告，幾個月前可不是這樣，五一黃金周赫然出現頭版廣告，盡是黃店寶號，「一大版有400間黃店名字，我喺最下面細細隻字，大家搵到就搵。份頭版（廣告）就係我畀錢，我做嘢就係咁，費事張揚，都係諗住撐黃圈。你問我可唔可以轉做藍店，我真係轉唔到。」
張老闆的升仙記要從去年支援手足說起，星火、612人道支援基金從法律途徑幫手，他另闢衣食住行戰線，「現金好危險，會被控洗黑錢；八達通有啲踩界，可以買火水、糖、麵粉，用嚟做乜大家自己諗；飯券、現金券最安全，所以當時集中做呢方面。」11月底索性成立「香港人嘅冰室資源分享中心」，高峯期租用四個單位，面積最小那個也有千幾呎，「當時不再想做支援，想教你一技之長，他日你憑一技之長搵錢，先有能力同呢個仆街政府鬥。」
據他說中心手足都感激他，「當然有好多阿諛奉承的說話，當然我會飄飄然，可唔可以做大啲，做多啲？如果可以做到星火咁大，幫到手足，我真係想，當時我真係心雄。」義工家長提議過年賣年糕、蘿蔔糕，所得利潤幫手足，還介紹供應商，最後張俊傑選了稍貴的一間，取其真空包裝，又可以試食，「所以有人插我食人血饅頭，私相授受，又話係富臨造，Ｘ你搵到係富臨出產畀我，你攞嚟告我，攞嚟話我囉！」
過年後兄弟爬山逐漸被齊心抗疫取代，他用糕點、盆菜所得的400多萬元搜購抗疫物資，遠至歐洲，「你知大陸班仆街好似蝗蟲，知道邊度有口罩就搵人掃貨。」尖沙嘴金馬倫道龍門現舖當時還未開張，用來收發口罩、搓手液，送給醫護及社福機構，單計收到其抗疫物資，報以感謝狀、感謝卡、帖子，可以查證的團體有基督教懷智服務處、香港心理衞生會、兒童心臟基金會、銀髮族老而不廢、香港關懷力量、麥理浩夫人中心等。
不時有人劈頭劈臉多謝這位龍門老闆。「我覺得有些喜出望外，街上的人經常多謝我，都係嗰句，我做我應該做的事，我亦都被傳媒、香港人捧得太高。」口罩炒價更高，他對一般市民改送為賣，「總之唔使錢買番嚟，一定唔會收錢賣出去；我用錢買番嚟都好，只要係醫護，我免費畀佢哋。你發覺呢個仆街政府可以玩死你，口罩到咗香港唔畀出嚟，然後我覺得我之前係咪有啲戇X，諗得太完美，當自己乜都做到。」
本文記者收過投訴，指龍門口罩食水深，張俊傑則強調每盒賺約10元。就當他沒有落袋，但原本幫手足的錢最終用來抗疫，是何道理？「我認，我冇知會所有龍門支持者，之前你哋畀錢我賺，買糕點、盆菜，我用喺第二個用途，係我唔啱，但當時我冇諗過我做呢件事，事後被指呃手足。」就在那時開始有人指摘他「正仆街」、「呃手足錢」、「食人血饅頭」。「開頭聽到好唔開心，我到底呃咗你乜嘢錢，你講我聽，咩年咩月咩日收過你咩錢，你姓甚名誰，我即刻畀番你。」
張老闆的地獄遊記也要從手足說起，後來資源中心開始失控，「好老實講，我認衰，冇咁大個頭唔好戴咁大頂帽，一日24小時，當時我瞓兩、三個鐘，我只可以用20個鐘，但我開廿幾三十條line，gel甲、美容、化妝、理髮，仲有一大堆手工藝，一個人管唔到咁多嘢，之後再開曲奇、糕點、盆菜，牽涉好多logistic，我一個人管理唔到，只有權力下放。」
那就要靠員工，有手足離職後指控他，將同路人送給手足的聖誕卡當垃圾，他反問：「如果係有，當時點解唔影相、唔話我？你𠵱家揸住叠聖誕卡話：『喺資源中心十樓垃圾桶搵出嚟，我救佢出嚟！』我X你咩，你講乜都得啦！到佢走嗰日都冇同我鬧交，冇鬧過我一句，但搖身一變，4月上高登講晒粗口，X我老母，我心諗做乜事，你咁唔妥我當時就X我啦，但當時你對住我喊、多謝我，到你走嗰日都冇X過我老母，做乜上高登新聞台猛咁X我老母？」
莫非他處事有問題，罵人太兇？「我可以好惡，我畀咩職位你，就對你有咩expectation，廚房大佬應該唔同散工，店長唔同普通樓面，如果廚房大佬做得衰過一個普通炒蛋夥計，店長做得衰過樓面夥計，我X你係應該。」即令如此，他仍幫手足，例如至今資助看骨醫，記者看過單據。
如今飲食業都要靠人工呼吸，龍門也沒兩樣，「基本上真係捱唔到，我講過畀屋企人聽，俾屋企人X到仆街，我買咗份保險，我自殺，可以賠錢畀佢哋，搞返掂龍門，但被阿媽、家姐X到仆街。」記者替他抹把汗，可以想像敵人會說：「你跳樓吖，跳落嚟當你贏，唔跳正契弟！」
他聽而不聞，自說自話：「到最尾我決定捱落去，因為我家姐同我講一句，人哋唱X你強姦，你跳樓係咪認X咗你強姦？然後我話咁唔X得，我份人好X怕輸，我好X鍾意贏，人哋想睇我死，我點都要頂住。」正當記者設法修飾「光復香港」這點，他說：「唔使修飾，你由得我死！」那好，不用跳樓。