曾國衛接受電台訪問，對美國制裁嗤之以鼻。講說話點講都得嘅，做實事就不是如此，如果真係唔驚，警察遮仔會為乜要花時間精神，5月底開始，就轉移資產入中資銀行啫。一位午飯飯局朋友嘅世姪女，搵美資快遞送口罩去三藩市，點知英文名同一位女士一模一樣，快遞公司職員即刻要佢拿身份證出來對一對號碼，對邊個號碼呀？咪係美國財政部網站公佈咗嗰11個身份證號碼中一位女士嘅號碼囉。一日咁多人去做快遞，居然因為英文名字雷同而要核對身份證號碼，你估快遞公司職員好得閒咩，以防萬一而已。小市民無辜受連累，只能嘆句奈何。
警察訓練亦受影響，已有報導話謝振中總警司原定去英國皇家軍事學院受訓一年，現在取消，其他年青有潛質警官，安排去英美受訓嘅，亦紛紛延期。唔去英美咪罷就囉，以後一於上北京公安部門／黨校受訓，唔去哈佛甘迺迪政府學院上堂，改去清華大學、人民大學，認識一啲未來孫力軍，幾好呀，可憑關係有北京老友撐腰，平步青雲，最怕係有一日，北京老友家中被搜出三噸重人民幣現金啫，或者北京後台突然被下馬如孫力軍，自己就要執生咯，保持低調唔好出鋒頭，即使係再次有200警員搜查報館，自己亦要收埋把口，縮得就縮，以防引起公憤。
有公憤不一定因為揸住國安法條款，耀武揚威，亦與市民正當權益受損有關。「香港製造」本已成為香港無形資產，貨品附Made in Hong Kong標籤，價錢可賣貴啲，企業投資者信心可以高啲，香港不少鐘錶由本地設計師設計交本地鐘錶業師傅製造，製成品鐘錶在外國亦註明香港製造，在外國好受尊重，被視為高質產品，現在被迫要標明Made in China，即亦會被視為低價貨，有關業界無不氣頂，例如美心月餅，在美國靠Made in Hong Kong幾暢銷，大家都知中國製造嘅月餅，乏人問津嘅啦。失去「香港製造」唔算有影響？望住本港製造之成品直情喊畀你睇，特區政府高官只會講「嗤之以鼻」，直情係不食人間煙火，離地萬丈！有商人及政府官員鼓吹香港再工業化，創造新產品、高質產品，但已失「香港製造」之名，工業再死過就真。