【公帑貼私企】
【本報訊】政府要求兩大超市百佳和惠康申請第二期「保就業」計劃時，須減價回饋顧客。勞工及福利局局長羅致光表示，兩大超市減價或提供優惠有帶頭作用，其他超市可能亦會減價，使市民受惠。惟有市民炮轟羅致光「無讀書」，指連鎖超市可用較低價錢向供應商取貨，其他超市難對撼，質疑羅不懂何謂規劃經濟。羅承認計劃「都幾多窿」，但辯稱若不經僱主發放，工作量勢大增，至2021年底計劃也未能實行，又反駁「我有讀書，我係讀經濟」。
羅致光昨在港台節目透露，「其中一間連鎖超市一早已經諗緊呢啲嘢，甚至一啲非政府機構，我哋都係抄嗰條橋」。他稱，超市在疫情下生意額未有受影響，甚至上升，「社會覺得佢哋可以回饋吓」，又指兩大超市減價有帶頭作用，其他超市可能會仿效，「其他行家會睇住，作為市場競爭，如因超市減價去回饋社會，其他超市可能要減價，變咗最後受惠係廣泛市民」。
他又指，統計處有資料可審視超市是否減價或提供優惠，當局亦會與超市協商，「佢哋要令到我哋滿意，超市價格我哋係知嘅，統計處有呢啲資料……但都會用協商角度處理件事，你話俾我哋聽點做，等我哋覺得係回饋社會，咁我哋（先）會接受有關申請」。
但節目主持質疑兩大超市可透過政府資助鞏固市場龍頭地位，對其他企業不公平。羅致光反駁，超市現時已可透過減價增加市場佔有率，「如果佢可以減價增加市場地位，或者減價而賺多啲錢，咁佢點解唔做啫？唔會因為我逼佢先要賺多啲錢……個市場行為本身今日都存在」。
惟羅此番言論遭聽眾趙小姐致電節目炮轟「無讀書」，指連鎖超市可用較低價錢向供應商取貨：「你話其他超市可以跟，跟嗰啲大型超市減價，我想問你有冇讀書㗎？咩叫規模經濟呀？大公司、大企業、大超市可以用比較低價錢同供應商攞貨，你唔知㗎咩，你仲搞乜嘢，搞乜嘢仲要咩回饋呀。」
她又批評，保就業計劃，打工仔未能直接受惠，「唔係真係幫到僱員，根本大家有供強積金，你咪喺MPF到計數，然後畀五折、四折又好，你咪畀個員工囉，你做咩要經僱主呀？你𠵱家仲搞埋嗰啲大型超市回饋……你搞咁多做咩？」
羅回應指「我有讀書，我係讀經濟」，重申計劃目的是為維持僱員與僱主關係，而直接資助僱員不等於令僱員有工作，只資助僱員會令公司倒閉，無助市民就業。
至於第二期保就業計劃同樣要求大型物業管理公司，將工資補助回饋業主。羅致光指，物業管理公司絕大部份開支為人力，故要求10多間大型物管公司，收到工資補貼後要回饋不少於八成予業主等，又指若物管公司不回饋業主，「佢唔跟，業主咪會換物管公司」。羅又指，兩期保就業計劃已耗逾800億元，市民勿期望有第三輪計劃。