誠達利用偽造維修、泊車收據行騙之餘，另以「的士股份投資」引人入局掠水，聲稱只需繳付一半首期就可擁的士牌一半股份，可隨時轉手套現，惟合約極不平等，投資者不能成為登記車主，卻要全權負擔的士所有維修及支出，有投資者損失50萬元，無奈延遲退休計劃，「唔好彩遇着呢間老千車行。」
「頭一年唔使供，仲會每個月畀幾百蚊你，等你覺得幾過癮喎。」梁先生2014年底接獲誠達職員來電推銷，指當時的士牌價500多萬元，一般需付約90萬元首期，但誠達推出「的士股份投資」計劃，游說梁繳付45萬元即可「上車」投資的士，他不虞有詐投資。
翌年問題逐漸浮現，投資計劃有支出，無收入，「突然之間話畀你聽，架車撞咗，但又冇相睇喎，淨係話遲啲有單畀你。」同時有大量不明維修項目，每月支出由8,000至20,000元不等，也有由車房「宏駿」發出的收據，兩年半內支出逾60萬元。
梁因經濟壓力，欲出售股份，誠達一直拖延，其間要他繼續供款和支付維修費，最終梁自稱失業無錢，誠達才肯商討，同時以扣除雜項、牌價跌幅為由，只肯退回9萬元給梁。
梁生曾報警，但報案室警員指，「因為你係一個人，咁就唔構成行騙。」他無奈接受誠達退款方案，終損失約50萬元，「老實講我孤身走我路，覺得完全冇法律去保障我。」事隔三年，梁明知不能追討，但希望能警惕他人，或令其他事主挺身追究。
的士車行車主協會會長吳坤成指，合資購買的士牌照雖不罕見，但合資者僅與車行簽約就從未聽聞，「梗係有風險啦……憑咩話架車自己有份？牌簿唔係你名。」他建議投資者如欲與人合股購買的士牌，應成立公司，再列明股份分配，保障雙方利益。