《文匯》、《大公》繼幾日前話完張崑陽「着草」去英國、之後又去台灣搞事後，突然轉個頭又追捧呢個「壞分子」，高舉張崑陽嘅言論去插主流民主派，為咗分化民主派，仲公然登埋張崑陽嘅「時代革命」言論，唔知咁算唔算曲線幫呢班抗爭派宣傳呢？左報用到呢招唱民主派分化，可見北京陣營幾想民主派分裂！
雖然八方唔明白，擁有出入境自由嘅市民張崑陽點解會被指「着草」，但既然《文匯》、《大公》講到佢周圍「唱衰香港」，相信都好憎佢呢個壞分子啦，但奇就奇在噚日又大篇幅引用被佢哋指勾結外國勢力嘅張崑陽言論，大字標題「張崑陽插傳統派：要留低又唔做嘢」，唔講八方仲以為《文匯》唔知去英國定台灣同張崑陽做咗專訪！《文匯》記者仲花時間睇埋網民留言，引網民話「不如諗吓點割佢哋（泛民）席」。
睇嚟《文匯》為咗分化民主陣營真係無所不用其極，不惜引勾結外國勢力嘅張崑陽講：「（泛民）受惠於『時代革命』」公然喺中聯辦旗下嘅《文匯報》宣揚「有港獨意味」嘅「時代革命」！其實佢哋係咪忘記咗，支持民主嘅市民都唔會睇《文匯》、《大公》㗎喎！呢篇宣揚「時代革命」意識嘅報道，相信只會「污染」親中人士嘅「根正苗紅」思想，八方作為「忠實讀者」，奉勸佢哋懸崖勒馬，停止拿石頭砸自己的腳。
李八方