同性戀不是罪，每人都有追求愛的權利，但出櫃仍需要勇氣，被網民評為「唱得好但紅唔起」的徐智勇（小肥），現在44歲之年，才敢站出來承認同志身份，原來背後最大的障礙，是擔心被人話抽水！
小肥日前在陳志雲的節目中出櫃，當日記者邀約小肥做專訪，他即時拒絕：「因為唔想藉住呢樣嘢好似招搖撞騙咁四圍講博宣傳放大自己！因為我覺得其實好似正面為多，我驚俾人有一種抽水嘅感覺！我唔想抽LGBT水！」考慮了兩天，小肥才答應做訪問。
出櫃後的小肥接受《蘋果》專訪，眼神仍帶點忐忑，「節目係錄影，錄完返去手都仲震緊、仲驚緊，出街嗰日好緊張，收到好多訊息打氣加油，但我都係好緊張。𠵱家心情開始唔緊張，好多留言話多謝，原來我行出嚟講，會賜畀佢哋勇氣同希望，以過來人身份發聲，唔使驚，你唔係孤獨。」小肥不怕公開同志身份，卻擔心被指抽水，「自己覺得今時今日出櫃，未必係一件壞事，甚至分分鐘對一個artist嚟講，你可能突然間唔同咗等級，我從來冇覺得呢樣嘢係貶嘅，𠵱家我出嚟咁講，會唔會有啲人話：『係咪小肥呢排冇乜新聞？』我唔擔心俾人話你係，反而擔心俾人話你做乜抽水。」
44歲，小肥不再隱瞞性取向，回想以前的恐懼，「始終同性戀喺呢個所謂正常社會裏面係小族群，當然𠵱家開放咗，但以前唔係嘛，由細到大生活圈子裏面，冇一個係同性戀，冇一個人可以分享同傾訴，咁我可以點呢？惟有融入佢哋，喺度裝，直至28歲，我覺得忍唔到，喺台灣交友網站認識到朋友，有傾訴對象，慢慢擴闊圈子。」
在攣與直之間，小肥亦曾掙扎過，「28歲前都問過自己點解會咁？嗰陣時我掙扎緊，我都想融入返你哋，但無奈我嘅喜好同感覺話畀我知，我唔可以扮你哋，我扮唔足！我可以同你扮晒喺度講，嗰個女仔幾好喎，但可能去到唔係色情只係普通揼骨，我都唔想去，28歲前我俾女仔掂吓都驚，我唔係唔鍾意女仔咁簡單，我直頭係怕，恐懼女性！」
對女性沒興趣的小肥，卻曾被女仔表白，令他手足無措，「我冇同女仔拍過拖，但有被女仔追過，但我驚，當時20幾歲，哈哈哈，以前澳門一齊參加唱歌班，記得有次落堂，突然間有個女仔捉住我衝出門口，跟住『ererer……我鍾意你。』我第一個反應：『吓，我未準備好，畀啲時間我。』其實我好細個，三、四歲已經知自己係，譬如有個男補習老師，夜晚用電單車車我返屋企，嗰時我已經覺得好好……嗰種感覺，哈哈哈！」
原來小肥好多藝人好友，早已知他的同志身份，特別是2007年同期出道的歌手，「本身同我溝通開嘅藝人好多個都知，第一個知嘅係周柏豪，09年大家拍港台劇，『小肥，你係咪基？』我記得冇答佢，柏豪繼續話：『得啦，唔使扮嘢，一睇就知。』之後同佢食飯，有帶我嘅ex畀佢睇過，我都有同江若琳、陳柏宇講。」同路人的藍奕邦和盧凱彤，曾合力為小肥寫歌《內外》鼓勵，「《內外》係邦寫畀我當時心態，同我講：『如果你冇諗住公開出櫃，其實主內冇問題。』」
公開性取向後，小肥放下包袱，更吸引男性向他示愛，「上年10月嘅事，不過佢喺高雄，見唔到，佢嚟香港慶祝生日識，朋友介紹，佢唔係呢行，感情？未取代到上一個，啱啱開始啫，未深切經歷，佢細我幾年，佢家人接唔接受？佢屋企人應該唔係好清楚，但我從來唔會顧慮，活在當下。」
場地提供：Next Door Cafe & Bar
撰文：余燕儀
攝影：沈健程
