歐洲足球賽事開快車，港男晚晚開夜車。大隊如巴塞、曼城、曼聯紛紛落車，有網友聯繫到——控球打法稱霸的時代正式宣告結束、領隊重要性更加顯著的機動時代正式降臨。我覺得言重了。球隊本身是有機生命體，只存在時間問題去演變，毋須動不動革掉一個時代。
直接講，換吓人就得。正如巴塞教練施迪安，慘敗於拜仁慕尼黑2：8當晚，球迷已經睇死他會被炒，維基百科即時把條目標示為懸空，易帥幾乎毫無懸念，因為有往跡可尋，早在今年一月會方就炒了華爾維迪。其實豈止巴塞，但凡愈強大的球會愈勇於手起刀落，摩連奴、施丹等鑽石級大師都嚐過屁股未坐暖便席位不保的滋味。
足球領隊，是世界上最朝不保夕的職業，暑期工都不如，那又怎能說「領隊重要性更加顯著」呢？或者說，正因為太重要，唔掂就要快快換，讓有能者居之。
如果特區領導班子亦復如是，你話幾好呢？
有能者居之，睇睇拜仁慕尼黑的阿方索．戴維斯便知，年方十九歲，出生於非洲加納南部布都布藍難民營，後隨家人蒙加拿大收容入籍，再到德國搵食，在上週之前，應該無乜人識佢，但幾下妙到毫巔腳法，玩殘巴塞老後衛，舉世矚目。天份加上苦練，足以改寫命運，體現真正世界大同，沒有論資排輩的迂腐，何等振奮人心！《聖經》說的，不可叫人小看你年輕。
球員比領隊矜貴（從天價轉會費可知），去年曼聯球員更曾聯手逼走摩連奴，無面俾；球迷又比球員矜貴。在足球領域，球迷有權唾棄球隊，球隊無權唾棄球迷。領隊像君主，球員像政府機關，球迷像國民。孟子曰：「民為貴，社稷次之，君為輕。」金字塔倒立才啱數。所以，足協、足總偶爾腐化，球隊不容腐化。腐化的球隊會無fans捧場，一早降班執笠。
足球是群體運動，上陣人數眾多，很容易代入國家民族意識，每逢世界盃總被講成列強爭霸。偏偏，中國在個人體育項目屢創佳績，唯獨國足得啖笑，商業掛帥的中超聯還好一點，為什麼？是否恰恰由於它太似一個國家？於是官僚主義上身，對內窩裏鬥，對外不准百姓批評。
波和月亮，都是西方的圓。