網上瘋傳一張「COVID-19 暴露記錄」圖片，流傳消息話大家手機都被秘密插入一個「COVID 傳感器」，更新手機之後會自動打開功能，令使用者行蹤被追蹤，嚇親唔少人，不過有議員澄清，呢個係Google同Apple合作設計嘅API，唔係可疑程式，亦唔會洩露大家位置，大家唔需要太擔心啦。
資訊科技界議員莫乃光同代表民主派選資訊科技界嘅候選人黃浩華就出post解釋，呢個COVID-19 Exposure Logging 其實唔係App，而係一個應用程式編程介面（API），只要冇安裝授權嘅App係唔會生效。其實，正因為多國政府為咗追蹤傳播鏈，用藍芽收集患者附近出現過嘅電話，然後通知電話主人，造成咗資訊安全隱患，所以Apple 同Google先研發呢個API畀各國政府用，保障返用户資訊安全。佢除咗唔係一個程式，亦唔會記錄用户個人資料及GPS位置，資料只係交返畀有用相關App嘅政府部門，而香港係冇相關授權App。
莫乃光話，港府都研究過整唔整類似嘅App，但最後決定唔用，所以各位唔需要擔心個新功能會令你嘅行蹤送中啦。