自香港開電視開台以來，三年間未睇過其任何節目，屋企收唔到是最大原因，節目不夠吸引也是事實，不過得知小儀主持的《酒勻全香港》，專門介紹香港酒業，題材創新，便上網追看。
結果小儀造出亮麗成績。通常無綫藝人到隔離台開節目，都會大為失色，豐富度緊湊度驟減，但小儀今次不會，不看右上角logo還以為正在看無綫，公平點說，其實比現時的無綫節目水準更高，起碼比起莫名其妙找個輝哥來胡言亂語優勝。節目內容十分紮實，除了有介紹香港道地酒商及釀酒廠，又找來多間精心用酒烹調特別料理的餐廳，更加設環節解答一般人對葡萄酒的謬誤，包羅萬有。
小儀貫徹一向鬼馬本色，不過到需要專業角度時，有恰如其份讓高手解說，作為搭檔的日本人和泉素行，廣東話很生硬聽落有點辛苦，得意度比起金剛更是差些少，但不時展現日本男兒的氣魄，講鹹嘢又夠放，也越看越可愛。節目其中一個亮點，找來業內公認的香港調酒師高手Antonio講雞尾酒，由真正高手講解其專業，絕對比起某些節目，完全由廣告商主導，或經常出現因裙帶關係的半桶水所謂專家看得順眼。
節目中介紹香港不少有心人，銳意把酒業技術混入香港特色，看時你會驚嘆其創意及用心。酒業在香港約10年前發展迅速，由手工啤到調酒，逐漸已經變成一種工藝，傲視國際。2008年政府實行葡萄酒零酒稅政策，就算不是主因，也一定是催化劑，可見訂立政策放人一馬，一定比只懂禁呢樣禁嗰樣及篤灰更有建設性。
森美樂於在無綫做男一及主持，小儀早前卻離開了，到開電視做新節目，是有原因的。節目中講到有調酒師堅持把香港材料滲入氈酒，她就指香港人：「𠵱家唔同環境之下，要去其他地方落地生根，離開香港，會掛住香港。」另外有補酒老闆，指要把中國補酒傳開去，小儀就更正他：「呢個要搣，係香港補酒，因為明明好多工作喺香港做。」這些對白在無綫中，肯定又會被重新配音。是的，若然要閃閃縮縮，不能表達自己所想，那收視30點又有何意義？小儀，呢鋪我撐你。
撰文：翁可人
本欄逢周五刊出
酷愛煲劇睇戲，冷門熱門乜都殺，小說《師戀高校》及《87年12歲條女失咗蹤》作者。