【感謝支持】
【本報訊】越打壓，市民越支持。警方以「港版國安法」為由，上周一拘捕多名壹傳媒高層，並高調搜查蘋果日報大樓，但本報無懼打壓堅持報道真相，翌日市民發起「印白紙都照買」行動，全城掀起搶購《蘋果》潮，隨即更有市民買下A1廣告、12個內頁全版的「連儂牆」撐《蘋果》。但除了熱心市民買《蘋果》撐「牆」外，更有「真黃報紙檔」同樣撐《蘋果》報道真相。
網民所稱的「真黃報紙檔」位於灣仔，檔攤的閘上貼滿《蘋果》連儂牆、「#WeNeedAppleDaily」、「#PressFreedom」海報，亦有「應有此報紙」、「我哋真係好X鍾意香港」等字句。檔攤工作人員貞姐寄語：「繼續堅持，講真說話係啱嘅，我哋會繼續撐落去。」
貞姐在灣仔的報攤做了10多年，她指去年爆發抗爭運動後，自己深受感動並想出一分力，此後陸續有自發的市民寫上心聲，貼在報攤的閘上，化成連儂牆。貞姐印象深刻的是，去年警暴不斷時，一名年老客人首次經過報攤，畫了張人面，人面流下一滴眼淚，並寫着：「香港人哭了。」
早前大批警員闖入蘋果日報大樓搜查，貞姐直言憤怒，「點解會變成咁？香港係咪冇新聞自由呢？」翌日全城搶購《蘋果》，貞姐記得當日《蘋果》銷量大幅上升：「（8月11日）《蘋果》都加咗報紙畀我，轉頭司機都問我使唔使加紙，平時《蘋果》賣30幾份，嗰日（11日）加咗紙之後，又同行家抆咗啲，都有540份。」
當日網民聲言印白紙都照買《蘋果》，貞姐相信不是戲言：「我都覺得大家會支持，因為（當日）之前都收到客戶消息，『聽日冇咯喎、聽日白紙喎』，但啲人又話白紙都照買，我都係印白紙照賣咯。」貞姐指，自己做了10多年報攤，從沒見過讀者如此踴躍支持一份報紙，「如果真係印白紙，係一個經典，要保存」。
對於連登網民「叛徒」開Post封貞姐所在的報攤為「真黃報紙檔」，貞姐指帖文出現後多了不少生面口的客人，而且持續光顧，當中不少是年輕人，「佢一行埋嚟我就知佢買《蘋果》㗎喇」，也有「轉會」熟客，「其實我有啲睇《東方》嘅客轉咗睇《蘋果》，即係有啲藍絲可能轉黃啦」。
貞姐記得早前疫情嚴峻，報攤曾協助向市民派發口罩，當中包括印有「時代抗疫」的文宣，有一位取口罩的婆婆埋怨：「使唔使黐咁多嘢？」貞姐即表示口罩是勇武抗爭者送的，但婆婆看來仍有不滿，「都唔使黐咁多嘢㗎」，貞姐即問：「咁你支唔支持林鄭（抗疫政策）。」婆婆隨即「收晒聲」。
回應「真黃報紙檔」稱號，貞姐笑言自己「真是黃」，但並非刻意藉此招徠，純粹為社會出一分力，「首先多謝佢哋先啦，齊上齊落，大家加油，香港人一定贏嘅」。對於連登網民「小西灣富城」提議有吸煙習慣的手足幫襯，因為賣煙賺得最多，貞姐則笑指多謝他的建議，但「煙唔係賺得最多，賺幾蚊一包，其實拉番勻計，各樣其實都係差唔多」。
被封鎖搜報館後一周，《蘋果》銷量不跌反升，貞姐指：「我覺得香港人真係好齊心，黃嘅可以好團結，搞到個黃色經濟圈，有咩事時候手足會互相幫忙。」對於搶購《蘋果》是不是三分鐘熱度，貞姐斷言不覺得：「佢哋都繼續再支持，仲要畀一個月嘅錢訂報紙，每一日落嚟攞。」對於港府近日頻頻打壓異見，被問到貞姐的報攤被封為「真黃報紙檔」後，會否擔心被藍絲或警方滋擾，貞姐直言「你話唔驚就假嘅，但係都要發聲。」
