在陸羽飲完茶。行到大道中馬莎門口，畀人拉一拉，叫一聲：「喂，喂」，一望，係投資S也，大家戴住口罩，幾乎認唔到，一開聲就認得啦，問佢點解唔去陸羽飲茶，佢話：「外父現在唔敢出街，連陸羽都唔敢去，日日在屋企，佢唔去，我訂唔到位㗎。」老人家日日留在家裏，有好有唔好，全無社交活動，老人心態更易衰退。
原來唔出街就有生活小麻煩，大編輯早已退休，賦閒在家，唔敢去理髮舖，在沙田走勻幾間電器舖，包括豐澤，都買唔到理髮用嘅「剷髮機」，全部理髮器缺貨。左丁山已經頭髮不多，過往幾個月先至去余道生行搵麥師傅理髮一次，麥師傅在2018年離世，都唔知去邊度好，索性每到曼谷，就在酒店理髮，點知現在行不得也哥哥，怎麼辦？左太唔抵得，索性用鉸剪同左丁山剪髮！但左太唔識洗牙嘅啫，想去洗牙，又驚與牙醫有緊密接觸，唯有一拖再拖，呢日在陸羽聽餐飲M講，佢約牙醫洗牙，點知牙醫話以後都冇洗牙呢回事，因為有環保承諾，保護地球，以免氣候暖化，牙醫已經唔准用噴劑作洗牙用！嘩，咁嚴格，牙醫少咗好多洗牙收入啫，呢條數唔知點計，我地想洗牙，還有甚麼方法？據講係要逐隻牙慢慢磨，需時甚長。牙醫係要用雙手賺錢，同件工差唔多，每日工作有幾多man-hour啫，一日收入有數得計，牙醫好難做星球人，我地去睇牙亦要多付費用咯！
六月時，餐廳食肆有V形反彈趨勢，本以為會愈來愈好，誰知外來機師／船員豁免病毒檢驗，中門大開，病毒傳入社區爆發第三波疫情，政府防範不力責任甚大。鬼咩，六月時政府忙於與中聯辦、港澳辦密謀推行港區國安法，餘事無暇應付，咪因為政治而誤了港人健康及本港經濟囉。食衛局本來唔需要講政治，但嗰位局長陳姑娘連好多人要返工都竟然唔清楚（金句：施行禁堂食之後，先知道原來咁多人要返工），靠佢守衛香港人健康，就好似搵一位業餘球員做曼城嘅守門員。疫情不止，餐飲業等執笠，撤銷晚上堂食禁令，亦只係苟延殘喘，大量職工失業，計將安出？依家話搞健康碼，搵內地幫手一日做五十萬個檢測，咁就要睇民建聯、工聯會表演，如何發動一日五十萬人去檢測咯，如市民無自發性，你估一日賣五十萬份蘋果日報咁易咩！