我冇立場嘅,延任一年,誓要去,抑或留,極多聲音分析留的壞處,但走頭之後,可以點呢?聲音即刻玩抖音,甩鍋說:到時見招拆招啫。噢,公定字,都你贏。
咁啦,講吓去留肝膽乜乜乜,好冇?
留,議員被神秘車隊啄住,蓄意辣㷫你。走人,跟蹤的「傳媒」唔單止被差佬放生,還會撩你打交,拍晒獨家。柒周後,上門拉人告你煽動恐嚇兼污衊国安。
留,差佬與立法會保安聯手,用招呼鄺俊宇的膝跪頸秘技,關愛泛民議員。走人,便衣差佬大隻過你柒倍,無喇喇告你打爆咗佢塊臉的痱滋。
留,抗爭派隔空問候你。走人,抗爭派與大波石等人,兜口兜面問候你。
留,見外國使節是日常。走人,冇議員身份就係勾結外國勢力。(除非個外國勢力是平壤政府)
留,見到鄭市長尊容令你反胃。走人,一樣。
留,唔係WFH,名正言順出糧。走人,斷糧意料中事,唔係689,預咗冇五千萬分手費,絕對唔會將立法會當做康橋咁再別。別再,像極了偷情。