經常見報嘅股評人黃國英，最近聯同香港股票分析師協會登廣告，澄清未有參與及組織任何投資群組。
究竟咩事？原來有人冒充黃國英嘅大名，係網上不同平台開設投資群組，提供虛假分析。據了解，有騙徒用黃國英身份建議散戶買入深藍科技（1950），結果中伏。黃發現此事係因為有受害人主動聯繫，據知受害人損失高達八成，涉及七位數金額！
上周蘋果都接到讀者報料，話喺一個WhatsApp群組內，有騙徒聲稱收到滙豐董事會成員邵偉信通知，將大手買入深藍科技，又於群組內發放與「邵偉信（滙豐董事）」WhatsApp內容，引股民買股。最終深藍科技於上周四下午開市3分鐘內，股價由1.6元急跌至0.4元，昨日收報0.28元，市值僅剩2.8億元。
黃國英慨嘆：「我哋建立個brand好耐，轉頭就被人冒認來賺錢。」華華認為，一個貪字，害人不淺，監管當局係時候提速加強投資者教育。
李華華