巴塞隆拿喺歐聯俾拜仁慕尼黑血洗出局後發生「大地震」，官方正式宣佈朗奴高文出任教練一職，簽約兩年，有報道話仲會搵埋拿臣做助教𠻹。呢位球員生涯踢過巴塞嘅荷蘭名宿一早已經飛抵巴塞，準備幫球隊重建地上最強嘅陣容，而巴塞會長巴杜美就話明，美斯仍然係球隊嘅絕對重心。而英國傳媒就爆料，話除咗美斯等幾個「非賣品」一定有得留低之外，朗奴高文將會為巴塞進行大換血，而佢嘅頭號獵物就係阿積士中場雲迪碧克。
施迪安上周喺歐聯八強唔衰攞嚟衰，排咗個4-4-2鑽石陣式，結果巴塞以2:8慘敗喺拜仁腳下，成績比只係贏得西超盃嘅13/14季更差，無論球員、球迷同球會高層都嬲到震，美斯仲威脅要走人，巴杜美就嗱嗱聲搵咗深受巴塞球迷愛戴嘅朗奴高文返嚟收拾殘局，話晒佢踢波嗰陣，喺阿積士同巴塞都有跟過荷蘭傳奇告魯夫，對4-3-3全能足球有深入理解，應該唔會好似施迪安咁亂嚟。
巴杜美話，佢已經同朗奴高文講好咗，2021年先約滿嘅美斯仍然係鎮隊之寶，一定唔會將佢賣走，除咗呢位33歲阿根廷球王之外，達史特根、基文迪朗格勒、尼爾遜施美度、法蘭基迪莊、基沙文、奧士文尼迪比利，同埋17歲小將安素法迪都係非賣品。至於今季被外借到拜仁嘅菲臘比古天奴，巴杜美就講明信任朗奴高文，會任由佢處置呢位巴西中場。
英國《太陽報》就爆料，指朗奴高文對巴塞正選陣容已有腹稿，將會大舉增兵，重建地上最強嘅陣容。報道話，高文嘅首要任務，係由阿積士撬走中場雲迪碧克，夥拍法蘭基迪莊同比真歷，而國際米蘭前鋒拿達路馬天尼斯同愛華頓射手李察利臣，亦有機會加盟成為美斯嘅拍檔。
高文嘅換血大計主要集中喺中前場，達史特根會繼續為巴塞把守最後一關，佐迪艾巴同尼爾遜施美度亦好有機會保住左右兩閘位置。中堅方面，雖然碧基已經開到口話如果唔再需要佢，就會自動離隊，但話晒都身經百戰，佢始終有一定作用。聽講巴塞打算用1,400萬鎊（約1.44億港元），將已經拒絕同曼城續約嘅19歲新星艾利加西亞帶返魯營球場。呢位巴塞青訓產品喺17年先過檔曼城，如果能夠回巢同碧基拍檔，相信都會學到唔少嘢。
