全球娛樂事業被武漢肺炎打殘，不少活動相繼取消或延期，但「2020韓國國際先生選舉」將於本月底如常舉行決賽。33位參賽Oppa近日在宣傳照中，大晒弗爆腹肌及人魚線，連陳欣妍及林芊妤（Coffee）也忍不住𥄫一𥄫，但網民卻狂踩一班韓國先生撞樣，又質疑他們激凸下體是後天加工。
韓國近日舉行「2020韓國國際先生選舉」（Mister International Korea Pageant），將於本月31號進行決賽，主辦單位日前公開33位Oppa的爆肌照，他們以性感牛仔造型出現，大晒結實朱古力胸腹肌和人魚線，下身更僅穿貼身白色三角褲，「雄風」盡現，吸引網民熱烈討論。據大會資料顯示，今屆韓國先生33位參賽者年齡介乎24至30歲，全部身高不少於170cm，他們來自各行各業，多數為健身教練及模特兒，也有消防員及咖啡師，還有較冷門的棒球裁判及放射科醫生等。
每年韓國先生跟韓國小姐選舉一樣，不少參賽者皆撞樣，網民瞬間「臉盲症」發作，網民看完33位猛男的晒肉照後，批評他們樣貌相近。不過當中真的有一對孖胎兄弟同時入選，是7號金成俊及12號金成勳。不少網民更直指眾男身材似造假，下體激凸效果更疑是「後天加工」，有網民留言：「係咪同一間整容醫院？複製人選美先生大賽？」、「係咪裝假狗？」、「究竟塞咗幾多對襪入去？」
最近成為新晉女神的陳欣妍日前着泳衣拍廣告大騷弗爆身材，昨日被問到韓國先生參賽者的看法，她表示：「我鍾意熱愛運動嘅男生，肩膀夠橫同有人魚線都好鍾意。由表面睇到佢哋咁弗，背後花咗好多心機同堅持，因為我都有操開，明白佢哋有幾辛苦，所以大家睇得開心之餘，都要佩服佢哋嘅努力。」
一副弗爆身材的林芊妤看罷參賽者爆肌相說：「佢哋除咗腹肌，手同腳都有肌肉，仲有青筋，青筋係要操到好犀利先有。同埋佢哋腹肌係有唔同，有啲扁啲、有啲唔對稱，其實畀心機操都唔係好難練。」網民質疑眾男下體加工，Coffee笑言：「冇留意，平時見身形好嘅靚仔最多望多兩眼，我反而鍾意睇女仔多啲。」而Coffee則睇好2號朴善俊及13號吳漢秀，因覺他們順眼自然。
先後參加過亞洲先生及香港先生的翟威廉就大讚參賽者高質素，不但肌肉夠大還很「乾身」，提到下體加工，他笑謂：「唔會，大家諗太多，如果係由攝影師做後期咪得囉。」至於撞樣，他認為只是攝影風格一致。翟威廉跟Coffee一樣睇好13號吳漢秀，指他條件平均，另外33號李寶亨則勝在靚仔。
身為健身教練的趙勁皓則指只要控制飲食及運動，男士不難有此身形：「當地運動風氣好好，參加得比賽一定準備好，影相前修身加埋脫水就好靚，唔可以抹殺人哋嘅努力。」趙勁皓曾參加健美比賽，問到當年下體有否加工影相？他謂：「我着沙灘褲，但一般着三角褲嘅選手，唔會特別去處理，例如放嘢入去，因為佢哋甫士動作大，唔方便。」
