唔會放過任何機會表演心繫社會嘅PoPo，當颱風海高斯旋風式襲港，天文台仲未落波，佢哋已經喺fb專頁貼相出文「邀功」，自詡「救急扶危」，因為警員「徹夜不懼風雨，協助移除路上雜物，為社會回復正常運作做準備」喎，帖文仲附上嘅四張相，見到有身穿制服人士圍住啲樹疑似處理中，驟眼睇好落力，不過八方發現，四張相背後大有玄機。
好似聲稱攝於柴灣嗰張，八方認出似係柴灣警署停車場。
另外兩張灣仔相，其實睇嚟睇去都係同一事發現場，唔通一稿兩投就當兩宗案？呢個事發地點其實係灣仔半山谷柏道，嗰度除咗間間超級豪宅，平時亦人迹罕至，塌樹最阻住嘅應該係富豪名車。而塌樹來源，八方翻查資料同相片比對，好大可能係唐英年姨仔郭瀛芷同恒生銀行創辦人梁昌家族後人梁仲賢兩戶之間嘅路邊大樹，唔知PoPo係巡邏見到所以主動清樹，定接獲居民要求，心繫上流社會於是立即趕去現場呢？
警察公共關係科回覆指，谷柏道塌樹是接到市民報案，警員清理其中一條行車線塌樹後，要求消防到場協助鋸走；而柴灣塌樹確在警署內發生，阻礙緊急車輛出入，警署警員自行處理。
李八方