因為疫情關係立法會選舉俾777強行押後，令到建制「戰狼」何君堯有得繼續做多一年議員，但唔知佢係咪都明白疫情來到隨時令議席可以永續。
佢噚日就發起「君事行動」，同一班建制派 KOL開記招，直情提出要全民強制檢測行健康碼，再同時實施禁足令，之後仲要市民去公共地方甚至返工都要有健康碼！仲話期望可以十．一同大陸全面通關。
究竟全民檢測同健康碼係咪有助抗疫，一眾本地醫學專家已經畀晒專業意見甚至警告，但政府就一意孤行，阿何戰狼仲覺得唔夠要加辣，強制全港檢測外同時發健康碼，再加14日禁足令，講明市民「乾淨（沒有染疫）嘅先可以出街」。
佢話咁可以換來長治久安，令香港人生活盡早回復正常，但八方恐怕如果真係咁實行，正如專家所講會令人放鬆防疫，疫情隨時再爆發，而冇健康碼唔畀出街，同全港戒嚴軍管有乜分別？