日前自爆因為俾美國制裁搞到用信用卡都受限制嘅777，噚日喺fb回顧公職生涯，原來佢加入政府40周年。777鴻文一開頭就話自己80年8月18日懷住戰戰兢兢心情行入下亞厘畢道政府合署報到加入做AO（政務主任），成篇感言一共出現咗14次「我」字，「市民」出現咗兩次，喺呢位所謂公僕心中邊個地位重要啲，好明顯啦！
777外號「好打得」，佢喺篇文就自爆一個官場公開秘密，原來冇人敢同佢做friend，因為佢好自豪話自己不群不黨，喺政府冇「馬房」又唔係「手袋黨」，所以被前輩笑指連晉升都會有阻滯。
其實777曾經講自己做到冇癮，最想去英國退休，又點諗到最後會做特首？與其話因為「遇到好上司、好同事」，不如話佢遇到習大大更準確吧！
777最後用小鳳姐名曲《順流逆流》作結，「故意挑剔今天我不在乎」、「從來得失我睇透」，佢唔介意畀大家知，佢一直將公眾意見當成故意挑剔，一個手執大權嘅人講睇透得失，同首富話自己視錢財如糞土有咩分別？