堅守民主自由價值嘅《蘋果》要撐落去，除咗員工要緊守崗位，外界嘅支持同鼓勵亦都好重要。上周一被警方拘捕嘅壹傳媒行政總裁兼《蘋果》社長張劍虹，最終被拘留近40小時後獲准保釋。張劍虹有名「沙膽虹」，當然唔會因莫須有罪名被嚇倒，獲釋後引述中大新亞書院校歌歌詞「艱險我奮進，困乏我多情」自勉，感謝香港人浴血長城保衞《蘋果》，強調「公道自在人心」。
公民黨前主席、資深大律師余若薇都出力撐《蘋果》，連日喺facebook發帖支持，如拍片呼籲網民要買埋《蘋果》25周年特刊《不是最終章》，指如果想《蘋果》有30年、50年、甚至更長時間，最緊要買多幾本，又話睇《蘋果》要撈埋廣告，身體力行撐黃圈。書法了得嘅余大狀仲向沙膽虹送上「艱險我奮進，困乏我多情」墨寶打氣，收到「厚禮」嘅沙膽虹話：「謝謝余大狀墨寶鼓勵。」
余若薇就喺自己嘅fb貼咗有關嘅《蘋果》即時新聞，仲發文好謙咁話：「人哋撐真係攞命博，買報紙寫吓字真係唔可以叫撐。」之後仲加咗hashtag#多謝唔嫌棄！
李八方