有人傳來叫泛民總辭的文宣，斬頭斬尾唔知作者是誰。姓潘那位斷估唔夠膽寫呢啲，寫咗都會用「國師」做筆名。呢篇唔似國師分身的佳作，第一，它暗插唔打算總辭的議員和議助要供車供樓。國師不食人間煙火係人都知，議員議助如果有子女，還要供書教學，有乜稀奇，全宇宙只有收成期的陳健波唔憂供車供樓！
第二，篇文針對「不辭派」蔡子強（放生鄭松泰）。61萬人初選前，很多文宣攻擊戴耀廷，今次子彈射蔡子強，同一路數，兩個月用兩次，係唔出奇嘅。跟蹤許智峯那個「傳媒」被差佬厚待，網民發現原來係四年前一直跟蹤到太古地鐵站刻意撩梁天琦打架那位仁兄。不同在，兩位學者唔會還拖，一笑置之。
第三，引用雙譚叫人留任的抽水語錄，還搭嚿豬頭骨劉兆佳，味道如內地二手烤肉！舌尖上的浪費，一來三件，逼泛民與選民光盤，喔，打包都難下嚥。
議員總辭，唔係再別康橋，梁主席當係劍橋x老院咁操持。然後，辭與唔辭，其實，都冇然後。