巴塞隆拿上周喺歐聯8強俾拜仁慕尼黑大炒8:2，超恥辱地出局，亦係自07/08球季以嚟首次冇盃落袋，咁丟架嘅成績實在好難令球迷接受，結果禮拜一終於宣佈教唔夠一年嘅施迪安冇得留低。施迪安傳被炒呢幾日，都已經傳過朗奴高文係接任嘅大熱，其實呢位荷蘭國家隊主帥上年都傳係球會嘅心水，所以球迷可能都唔係太意外。不過最爆係傳出話朗奴高文如果走人，橙軍竟然想搵前阿仙奴領隊雲格出山接手，搞到呢場換帥風暴好似越吹越好睇。
朗奴高文球員時期就效力過巴塞，想返前球會做教練，其實一直都唔係秘密嚟，之前荷蘭足總高層仲承認，同高文嘅合約寫明踢完2020年歐國盃後（因武肺疫情延至2021年夏天），巴塞可以隨時撬佢走。不過假如高文真係教巴塞嘅話，荷蘭隊主帥個位就會出現真空。
不過有傳媒就話，去咗國際足協做全球足球發展總監、家陣已年屆70歲嘅雲格，已經自薦接替高文做新任橙軍教頭，即係代表佢有機會帶領荷蘭踢下年舉行嘅歐國盃。雖然唔係佢最想教嘅法國隊，但都可以話完成佢想教國家隊踢大賽嘅心願。
當然，雲格自薦教波唔係第一次，佢之前向德甲拜仁慕尼黑hard sell自己，點知慘食檸檬，所以荷蘭足總係咪真係會搵佢，就真係要睇下回分解。至於高文接手巴塞，又係唔知可唔可以即時解決到巴塞嘅問題，因為隊內核心球員老化一直都困擾住球會，所以有傳巴塞換帥後就會嚟一次大清洗，除咗有五位球員係非賣品之外，其他一律都會批准離隊，至於呢五位球員分別包括有之前有傳想走人嘅球王美斯、達史特根、法蘭基迪莊同埋兩名新丁安素法迪同佩治。就算係美斯嘅老友蘇亞雷斯，睇怕留隊機會都唔大，因為阿蘇作為家陣隊內嘅老將，巴塞已打算簽國際米蘭前鋒拿達路馬天尼斯接班。不過阿蘇都唔使擔心冇下家嘅問題，事關佢嘅前東家阿積士希望簽佢，加上阿蘇之前話過想返阿積士，所以呢單交易都有機會成事。
身在非賣品名單當中嘅達史特根，雖然好大機會留隊，不過季初都未必見到呢位德國門將。因為巴塞已經證實，為咗解決達史特根上季季初嘅右膝發炎問題，需要即時接受手術，之後仲要唞3至4個月。基於新一季西甲會喺9月12號開鑼，即係話佢參加唔到巴塞嘅季前熱身同埋季初嘅比賽。