建制派以往控制18區區議會，成日同政府聯手打壓民主派區議員，點知風水輪流轉，建制派去年11.24區選大敗，民主派重奪控制權，執正番啲規矩，今次到建制派話俾民主派「打壓」！
民建聯立法會議員葛珮帆噚日同佢班支持者開記者會，話沙田區議會以「與政黨或政治團體有聯繫」為由，否決部份被指係親建制團體撥款申請，葛博士好不滿今屆沙田區議會《撥款規則》，增加「與政黨或政治團體有聯繫」準則，但冇清晰交代細則，質疑民主派區議員「黑箱作業」，仲點名沙田區議會主席程張迎同另一區議員李志宏友好組織有份，仲話會向廉政公署舉報同向民政事務局長反映。
其實以往由建制派操控嘅區議會，已經不時被揭以不同名目撥款益友好組織，李志宏就向八方反駁指控，以往建制派喺議會偏頗親中團體撥款申請，連利益申報都唔做，而佢有按程序利益申報，喺撥款過程中冇投票冇話語權，仲話歡迎建制向廉政公署舉報，要查應該查晒以往咁多屆區議會的撥款申請；程張迎亦話，喺申請撥款過程中佢有利益申報，亦冇投票權利，強調按議會規矩辦事。