壹傳媒創辦人黎智英上周一被拘捕，警方更大規模佔領搜查《蘋果》大樓，引起各界不滿。前日加拿大各省市有多批人士舉辦撐港集會聲援，身在多倫多的鄭敬基於胸前戴上撐《蘋果》襟章，現身當地集會，手持蘋果帶領數百人一起合唱《願榮光歸香港》，他說：「希望有更多喺加拿大嘅香港人出嚟，一齊幫香港。」
香港警方上周一以國安法之名拘捕壹傳媒創辦人黎智英及多名壹傳媒高層，更出動200警察佔領搜查《蘋果》大樓，事件轟動世界。身在加拿大為港打國際戰線的鄭敬基，早前手持《蘋果日報》開live撐《蘋果》，又呼籲加拿大各省市的香港人在周日上街，為公義發聲。
加拿大時間前日，身穿黑衣戴上黃色口罩、胸前戴上撐《蘋果》襟章的鄭敬基，現身多倫多一個支持港人抗爭集會，他拿起咪以英語發言：「哪怕失去我所有的歌曲，我寧願只懂得這一首歌，大家一起唱吧！《願榮光歸香港》！光復香港！」隨後在場不同種族膚色的數百名聲援人士一起大合唱，不少人更高舉「五一」手勢，又揮舞旗幟及標語。
唱畢《願榮光歸香港》後，鄭敬基手持一個新鮮蘋果，帶領在場人士大叫「光復香港！時代革命！營救手足！」大量網民看畢片段後，都留言多謝鄭敬基及「海外手足」，更稱「全世界唯一一首歌，乜人唱都一樣有咁好聽！」
《蘋果》昨日聯絡鄭敬基，他說：「今次大會問我可唔可以最後帶大家唱《榮光》，心入面係好激動，覺得自己唔配，不過梗係應承啦，因為現場有主流嘅人（加拿大人）喺度，我要畀佢哋知道香港人嘅情況。身為一個歌手，香港好多時會話『你唔出聲咪好多工作』，我同佢哋講，如果我淨係識《榮光》而冇咗其他機會唱歌，我唔介意。」
鄭敬基又指：「加埋都有成700人，最感動係有西藏代表、台灣代表、仲有越南、維吾爾，最驚訝有啲係內地嚟，佢哋叫自己做『中國民主黨』，大部份都識唱《榮光》，好多加拿大嘅香港人到晒，又拎住個蘋果一齊唱。」他續說：「與此同時見到溫哥華嗰邊，太極嘅雷有曜站台唱《榮光》，感覺到咁多年做歌手，最榮幸最感恩係呢一刻，一路睇返都好感動，希望有更多喺加拿大嘅香港人出嚟，一齊幫香港。」
敢言的鄭敬基去年開始積極關注社會運動，並跟太太Angie參加遊行，不過疑因政治立場影響不獲無綫續約，他本來計劃到馬來西亞開製作公司，年初卻因疫情煞停，之後他轉做YouTuber大受歡迎，又舉行網上直播音樂會。上月他宣佈跟太太、母親與愛犬暫別香港，到加拿大生活，不過仍於不同平台發聲，打國際線繼續抗爭。早前他在加拿大舉行毋忘7.21的街頭活動，又去見加拿大國會議員Erin Otoole，向他表示香港極需要得到國際支援。