銀行界「紅褲子」出身、退休後重出江湖嘅八達通行政總裁張耀堂（Sunny），今次終於真．退休喇。八達通董事局宣佈，委任李俊明為下任掌舵人，任期喺下個月1號正式生效。
李俊明現時為八達通首席發展總監，董事局相信佢可以繼續推動八達通業務發展，帶領集團應對目前多變及充滿挑戰嘅營商環境。
八達通非執行主席艾爾敦就話，公司發展策略一直以為香港市民提供安全、方便及高效率嘅支付平台為首要考慮；話雖如此，𠵱家部份後生仔拒絕使用八達通，寧願用現金，都唔想益八達通嘅大股東港鐵（066），睇嚟新任CEO要諗計拆一拆。
至於張耀堂，2015年1月接掌八達通，完咗三年合約期後再獲延任，期間同港府合作推出公共交通票價優惠計劃，又夥拍蘋果同三星進行策略性合作，推出虛擬八達通等，算係功成身退。
李華華