中國式「戰狼外交」一向惹笑，西方政界不時喺Twitter恥笑戰狼外交官，英國民間組織Hong Kong Watch發起人羅傑斯係其中一個。佢經常tag中國駐英國大使劉曉明，質問佢新疆同香港人權問題。劉曉明最近搵到反制武器，就係「自閉式襲擊」block user，直接封鎖羅傑斯Twitter賬戶。堂堂外交官變「絕交官」，有連登仔不禁問：「這是正式錄用的外交官嗎？」不過羅傑斯喺分享連登仔呢個討論時，無端端畀網民話佢犯咗禁都唔知。
羅傑斯Twitter出po，話劉曉明喺Twitter賬戶block咗佢，仲喺個人Twitter貼文分析「死因」。原來羅傑斯最近頻頻tag劉曉明，質問點解愛好和平嘅中國經常打壓人權，又質問係邊個每日講大話破壞中英關係，結果就俾劉曉明封鎖。羅傑斯話由於駐英大使唔騷佢，於是追蹤次一級嘅中國駐英公使馬輝，兩人雖然未見過面，不過大家惺惺相惜，因為馬輝三年前曾經警告過羅傑斯將會被拒入境香港。
羅傑斯俾劉曉明block呢單嘢，連登仔好快開po恥笑，仲笑劉曉明「這是正式錄用的外交官嗎？」羅傑斯好快將連登討論區恥笑「絕交官」嘅po喺Twitter分享，連個po嘅標題「笑X死」三個字都出埋，有網民即時留言話個X字係粗口喎！近來努力學中文嘅羅傑斯即時澄清，話個粗口唔係佢寫，佢亦唔知X字意思。經一事長一智，八方有信心羅傑斯好快可以掌握呢個粗口字嘅神髓。
李八方