過去一星期香港傳媒同文化界迎來黑暗嘅時分，先有壹傳媒創辦人黎智英因國安法被捕，《蘋果》遭200名警察佔領搜查；後有填詞人林夕俾中央台點名批評佢為羅冠聰改歌詞，係同「港獨搞到一塊兒」。呢兩個俾北京打壓嘅人物，噚日喺《蘋果》果燃台隔空深情對話，兩個大男人除咗講政治講生活，仲傾到人生哲理同點克服恐懼，不過最感動嘅部份，就係黎智英講到屋企人，原本侃侃而談嘅佢，亦一度失控落淚無法說話。
對談噚日下午開波，黎智英同夕爺都着上白色衫，兩人喺視像見面恍如隔世，平日叫黎智英做Jimmy嘅夕爺，噚日改口叫對方做肥佬黎，仲拎近日網上瘋傳黎智英做《今夜不設防》嘉賓嘅片段講，夕爺話有網民話當年黎做佐丹奴做到悶，用玩樂心態做《蘋果》，好兒戲，呢啲人咁講別有用心、想抹黑佢，對黎智英好唔公道，夕爺話佢熟悉嘅肥佬黎絕對唔係講玩嘅人。
兩人傾咗個幾小時，之後同讀者傾偈，其間一度冇聲，夕爺話唔通《蘋果》俾人滅聲？ 黎智英即刻話唔會，《蘋果》會遇到一啲阻滯係必然嘅，但會克服，《蘋果》會繼續發聲。
咁打入嚟讀者講乜呢？黎智英兩子一向低調，但上星期都被牽連拘捕，讀者Louise問黎智英私底下有冇同囝囝傾談將來？黎智英好堅定咁答：「我哋好close，唔覺得對唔住囝囝，我哋命運從來係一齊，家人最重要係互相支持。」
另一位陳小姐提及黎智英兩個仔，就觸動黎嘅神經：「如果CCP（中國共產黨）攞你屋企人做人質，你會唔會放棄《蘋果》？」黎智英靜默一陣，跟住情緒失控落淚：「呢個係我唔想諗嘅問題，唔知點面對，最唔想面對，家人對我嚟講最重要，唔係事業唔係名譽，係家人，如果發生，我唔知點面對。我唔會諗，但我唔覺得佢哋會做到咁離譜。」夕爺安慰：「未發生嘅事，放低憂慮，呢個唔係逃避，我覺得物極必反，如果做到咁離譜，全世界會有反作用，佢哋要承擔代價，而且代價好大，香港可能因此而得救。」
夕爺仲勉勵香港人要同政權鬥長命，好多生活點滴都可以令人快樂，要有生活，唔係就會好似「滅絕師太」咁陷入權力螺旋，而夕爺就提醒滅絕師太下場係好慘㗎。
李八方